ஆட்டிடியூட் காரணமாக அணியிலிருந்து நீக்கப்பட்டேன்.. ஆனால் அது பற்றி எனக்கு தெரியாது

ஆட்டிடியூட் காரணமாக அணியிலிருந்து நீக்கப்பட்டேன்.. ஆனால் அது பற்றி எனக்கு தெரியாது- ஹர்திக்

மும்பை: இந்திய அணியின் கேப்டனாக செயல்பட்ட அனுபவம் குறித்து நட்சத்திர ஆல்-ரவுண்டர் ஹர்திக் பாண்டியா மனம் திறந்துள்ளார். காயம் காரணமாக முழுமையாக குணமடையாததால், அவர் இங்கிலாந்துக்கு எதிரான ஒருநாள், டி20 தொடரை தவறவிட்டார். ஹர்திக் பாண்டியா முதன்முதலில் 2022 இல் டப்ளினில் அயர்லாந்துக்கு எதிரான டி20 போட்டியில் இந்திய அணியை வழிநடத்தினார். பின்னர், 2023-ல் ஆஸ்திரேலியாவுக்கு எதிரான ஒருநாள் போட்டியிலும் கேப்டனாக அறிமுகமானார்.

தான் ஒருபோதும் கேப்டன் என்ற பட்டத்திற்காக விளையாடியதில்லை என்றும், கேப்டனாக இல்லாதபோதும் அணியை வழிநடத்தும் தனது திறமை மீது தனக்கு நம்பிக்கை இருப்பதாகவும் அவர் தெரிவித்தார். இது குறித்து பேசிய அவர், "தலைமைப் பண்பு என்று வரும்போது, என் மீது எனக்கு எப்போதும் சந்தேகம் வந்ததில்லை."

"நான் வெறும் பொறுப்புகளுக்காகவோ அல்லது எனது பெயருக்கு பின்னால் இருக்கும் பதவிகளுக்காகவோ விளையாடுவதில்லை. நான் ஒரு தலைவன் என்பதை எப்போதும் உணர்ந்திருக்கிறேன். நான் விளையாடும் எந்தவொரு அணியிலும் எனக்கான தனித்துவமும் செல்வாக்கும் இருக்கிறது என்பதை நான் அறிவேன். நான் கேட்டுக்கொண்டால் சக 11 வீரர்களும் என்னை பின்பற்றுவார்கள்."

"ஒரு தலைவனாக இருப்பதற்கு நீங்கள் கேப்டனாக இருக்க வேண்டிய அவசியமில்லை என்று நான் எப்போதும் நம்புகிறேன். ஒரு வீரராகக் கூட நீங்கள் தலைவனாகச் செயல்பட முடியும். மிகவும் அதிர்ஷ்டசாலியாகவும் நன்றியுடனும் உணர்கிறேன். நான் இதற்காக ஒருபோதும் விளையாடியதில்லை. கிரிக்கெட் பயணத்தைத் தொடங்கும் ஒவ்வொருவரின் கனவும் இந்தியாவுக்காக விளையாடுவதுதான்.

"ஆனால் கேப்டனாக இருப்பது கூடுதல் பெருமை. ஆனால், அந்த மகிழ்ச்சியான உணர்வு எனக்கு ஐந்து நிமிடங்கள் மட்டுமே நீடித்தது. அதன்பிறகு, அணியை எவ்வாறு மேம்படுத்தலாம் என்று சிந்திக்கத் தொடங்கினேன். அந்த ஐந்து நிமிட தருணத்தை நான் மிகவும் ரசித்து மகிழ்ந்தேன். இத்தகைய விஷயங்களை நான் மனதிற்கு மிக நெருக்கமாக வைத்துக் கொள்வதில்லை, ஏனெனில் இது எப்போது வேண்டுமானாலும் நம்மை விட்டுப் போகலாம்" என்றார்.

"மக்கள் கேட்கும் கேள்விகளுக்குப் பதிலளிப்பது எனக்கு முக்கியமல்ல, ஏனெனில் அது எனக்கு தேவையற்ற ஒன்று. நான் செய்யும் காரியத்தில் நான் மகிழ்ச்சியாக இருக்கிறேனா என்பதுதான் எனக்கு முக்கியம். நான் கிரிக்கெட்டில் இருந்து சற்று விலகி ஓய்வெடுத்ததற்குக் காரணமே, என் மனதை புத்துணர்ச்சியடையச் செய்து அந்த பழைய துடிப்பை மீட்டெடுக்கத்தான். அது விளையாட்டை ரசித்து விளையாடுவதற்காக மட்டுமே."

"நான் கடினமாக உழைத்தபோது, அது எனக்காகவும், எனது சொந்த மகிழ்ச்சிக்காகவும், எனது மன அமைதிக்காகவும் மட்டுமே தவிர மற்றவர்களுக்காக அல்ல. அனைத்தும் சரியாக நடக்கும்போது, நான் விமர்சகர்களுக்குப் பதிலடி கொடுத்துவிட்டேன் என்று அனைவரும் கூறலாம், ஆனால் எனது நோக்கம் அதுவல்ல. என்னை நான் திருப்தியாக உணர்வது மட்டுமே எனது இலக்காக இருந்தது," என்று அவர் கூறினார்.

"நான் வந்த இடம் மற்றும் எனது பயணத்தின் அடிப்படையில் நான் தனித்து நிற்க வேண்டியிருந்தது. ஆரம்பத்திலிருந்தே எனது குணம் முற்றிலும் மாறுபட்டதாக இருந்ததால், நான் வளரும்போது பல சிக்கல்களைச் சந்தித்தேன். வண்ணமயமான விஷயங்களை எனக்குப் பிடிக்கும், நான் எப்போதும் சுறுசுறுப்பாகவும் நகைச்சுவையாகவும் இருப்பேன். நான் வழக்கமான பாரம்பரிய கிரிக்கெட் வீரர்களைப் போல இல்லாமல், சற்று வித்தியாசமான நபராக இருந்தேன்."

"இப்போது அது எனக்குச் சாதகமாக அமைந்திருக்கலாம், ஆனால் ஆரம்பக் காலத்தில் எனது ரன்களுக்காக அல்லாமல், எனது 'ஆட்டிடியூட்' காரணமாக நான் பலமுறை அணியில் இருந்து நீக்கப்பட்டேன். உண்மையைச் சொல்வதென்றால், அப்போது 'ஆட்டிடியூட்' என்றால் என்னவென்றே எனக்குத் தெரியாது. அது குறித்து எனக்கு எந்த யோசனையும் இல்லை," என்றார்.ஆகஸ்ட் 2026 முதல் தொடங்கவுள்ள ஒருநாள் மற்றும் டி20 போட்டிகளுக்கான இந்திய அணியின் வெள்ளைப்பந்து தொடர்களில் ஹர்திக் பாண்டியா மீண்டும் களமிறங்குவார் என்று எதிர்பார்க்கப்படுகிறது.