சுப்மன் கில் பேட்டிங் ஸ்டரைக் ரேட் 190.48! டி20 போட்டியில் அபார பேட்டிங்

சுப்மன் கில் பேட்டிங் ஸ்டரைக் ரேட் 190.48! டி20 போட்டியில் அபார பேட்டிங்

மும்பை: இந்திய டெஸ்ட் மற்றும் ஒருநாள் கிரிக்கெட் அணியின் கேப்டனான ஷுப்மன் கில், பஞ்சாப் கிரிக்கெட் சங்க ஐஎஸ் பிந்த்ரா மைதானத்தில் நடைபெற்ற ஷெர்-இ-பஞ்சாப் டி20 லீக் தொடரில் அறிமுகமாகியுள்ளார். ஃபாசில்கா ஃபால்கன்ஸ் அணிக்காக களமிறங்கிய அவர், லுதியானா லயன்ஸ் அணிக்கு எதிராக அதிரடியான பேட்டிங்கை வெளிப்படுத்தினார்.

தொடக்க ஆட்டக்காரராக களம் கண்ட 26 வயதான கில், வெறும் 21 பந்துகளில் 190.48 ஸ்டிரைக் ரேட்டுடன் 40 ரன்கள் குவித்தார். இதில் 7 பவுண்டரிகளும், ஒரு சிக்ஸரும் அடங்கும். ஆட்டத்தின் போது, இந்திய அணியின் வேகப்பந்து வீச்சாளர் அர்ஷ்தீப் சிங்கின் ஓவரில் இரண்டு பவுண்டரிகளையும், மும்பை இந்தியன்ஸ் அணியின் நட்சத்திர வீரர் கிரிஷ் பகத்தின் பந்துவீச்சில் அடுத்தடுத்து இரண்டு பவுண்டரிகளையும் விளாசினார்.

அரைசதம் அடிப்பார் என்று எதிர்பார்க்கப்பட்ட நிலையில், கார்த்திக் சாதா வீசிய ஆட்டத்தின் 10-வது ஓவரில் சலில் அரோராவிடம் கேட்ச் கொடுத்து கில் ஆட்டமிழந்தார். 2026 மே மாதத்தில் நடைபெற்ற ஐபிஎல் இறுதிப்போட்டிக்குப் பிறகு ஷுப்மன் கில் விளையாடும் முதல் டி20 போட்டி இதுவாகும். ஐபிஎல் இறுதிப்போட்டியில் குஜராத் டைட்டன்ஸ் அணிக்காக ராயல் சேலஞ்சர்ஸ் பெங்களூரு அணிக்கு எதிராக விளையாடிய கில், அதில் 8 பந்துகளில் 10 ரன்கள் மட்டுமே எடுத்திருந்தார்.

கடந்த மாதம் இலங்கைக்கு எதிரான இரண்டு போட்டிகள் கொண்ட டெஸ்ட் தொடரில் இந்திய அணியை 1-0 என்ற கணக்கில் வெற்றிக்கு அழைத்துச் சென்ற கில், தற்போது இந்தியாவின் டி20 அணியில் இடம் பெறவில்லை. அவர் கடைசியாக 2025 டிசம்பரில் தர்மசாலாவில் தென்னாப்பிரிக்காவுக்கு எதிராக சர்வதேச டி20 போட்டியில் விளையாடினார்.

2026 ஐபிஎல் தொடரில் 700-க்கும் அதிகமான ரன்களைக் குவித்த போதிலும், நியூசிலாந்து தொடர், டி20 உலகக் கோப்பை 2026, அயர்லாந்து, இங்கிலாந்து, ஜிம்பாப்வே மற்றும் ஆப்கானிஸ்தான் தொடர்களுக்கான இந்திய அணியில் அவர் தேர்வு செய்யப்படவில்லை.

ஷுப்மன் கில் அடுத்ததாக செப்டம்பர் 27 அன்று திருவனந்தபுரத்தில் தொடங்க உள்ள மேற்கந்திய தீவுகள் அணிக்கு எதிரான மூன்று போட்டிகள் கொண்ட ஒருநாள் தொடரில் இந்திய அணிக்காக விளையாடுவார் என்று எதிர்பார்க்கப்படுகிறது. இந்தத் தொடரின் இரண்டாவது ஒருநாள் போட்டி குவஹாத்தியிலும், மூன்றாவது மற்றும் இறுதிப் போட்டி அக்டோபர் 3 அன்று முல்லன்பூரிலும் நடைபெற உள்ளது குறிப்பிடத்தக்கது.