"இந்தியாவுக்கு மட்டும் நல்ல பிட்ச் ஆனா பாகிஸ்தானுக்கு..".. இங்கிலாந்து மீது பாசித் கான் புகார்

"இந்தியாவுக்கு மட்டும் நல்ல பிட்ச் ஆனா பாகிஸ்தானுக்கு..".. இங்கிலாந்து மீது பாசித் கான் புகார்

லண்டன்: இங்கிலாந்துக்கு எதிரான டெஸ்ட் தொடரில் பாகிஸ்தான் அணி படுதோல்வி அடைந்துள்ள நிலையில், அதற்கு இங்கிலாந்து கிரிக்கெட் வாரியம் தான் காரணம் என்றும், இந்தியாவுக்கு மட்டும் சாதகமாக பிட்ச்களைத் தயாரிக்கிறார்கள் என்றும் பாகிஸ்தான் முன்னாள் வீரர் பாசித் கான் சகட்டுமேனிக்கு குற்றம் சாட்டியுள்ளார்.

இங்கிலாந்து சுற்றுப்பயணம் மேற்கொண்டுள்ள பாகிஸ்தான் அணி, முதல் 2 டெஸ்ட் போட்டிகளிலும் படுமோசமாக விளையாடித் தோல்வியடைந்தது. இதில் முதல் போட்டி 3 நாட்களிலும், இரண்டாவது போட்டி மழையின் காரணமாக சற்று கூடுதல் நேரம் எடுத்துக் கொண்டதால் 4 நாட்களிலும் முடிவுக்கு வந்தது. கடந்த ஆண்டு இந்திய அணி இங்கிலாந்து சென்ற போது ஐந்து டெஸ்ட் போட்டிகளும் ஐந்தாவது நாள் வரை விறுவிறுப்பாக நடந்தன. இதனால் அதிருப்தியடைந்த பாசித் கான், பாகிஸ்தான் தொலைக்காட்சி நிகழ்ச்சி ஒன்றில் பேசும் போது இந்த விசித்திரமான வாதத்தை முன்வைத்துள்ளார்.

இது குறித்து அவர் பேசுகையில், "இந்தியா இங்கிலாந்துக்குச் செல்லும்போது மட்டும் டெஸ்ட் போட்டிகள் 5-வது நாள் வரை செல்கின்றன. ஏனெனில் போட்டி 3 நாட்களிலேயே முடிந்தால் அது இங்கிலாந்து வாரியத்திற்குப் பொருளாதார ரீதியாகப் பெரும் நஷ்டத்தை ஏற்படுத்தும். இதனால் இந்தியா விளையாடும் போது மட்டும் எப்படியாவது போட்டி 5 நாட்கள் வரை நீடிக்கும் வகையில் பிட்ச்களைத் தயாரிக்கிறார்கள்" என்று சாடினார்.

மேலும், "இந்தியா எங்குச் சென்றாலும் அவர்களுக்குப் போட்டி நடத்தும் நாடுகள் சிறந்த பிட்ச்களைத் தயாரித்துக் கொடுக்கின்றன. இந்திய டெஸ்ட் தொடர்கள் மூலம் மட்டுமே அதிக வருமானம் ஈட்ட முடியும் என்பதால், 15 நாட்கள் திட்டமிடப்பட்ட கிரிக்கெட் போட்டிகள் முழுமையாக நடைபெற வேண்டும் என்று அவர்கள் விரும்புகிறார்கள். ஆனால் பாகிஸ்தான் செல்லும் போது மட்டும் 3 நாட்களிலேயே போட்டி முடியும் வகையில் பிட்ச் தயாரிக்கப்படுகிறது" என்று எந்தவித ஆதாரமும் இன்றிப் பேசியுள்ளார்.

இங்கிலாந்து டெஸ்ட் தொடரின் முதல் இரண்டு போட்டிகளில் பாகிஸ்தான் அணி நான்கு இன்னிங்க்ஸ்களில் ஒரு முறை கூட 200 ரன்களை தாண்டவில்லை. இந்த நிலையில், தோல்விக்குத் தங்களது சொந்த வீரர்களின் சொதப்பல் பேட்டிங்கே காரணம் என்பதை ஒப்புக்கொள்ளாமல், இந்தியாவை வைத்து இங்கிலாந்து கிரிக்கெட் வாரியத்தின் மீது பாகிஸ்தான் முன்னாள் வீரர் பழிபோடுவது சமூக வலைதளங்களில் கேலிக்குள்ளாகியுள்ளது.

முதல் 2 டெஸ்ட் போட்டிகளில் ஏற்பட்ட தோல்வியைத் தொடர்ந்து, பாகிஸ்தான் அணியில் இருந்து 7 வீரர்கள் நீக்கப்பட்டுள்ளனர். முற்றிலும் மாற்றப்பட்ட புதிய பிளேயிங் லெவனுடன் பாகிஸ்தான் அணி தனது 3-வது டெஸ்ட் போட்டியில் நாளை (செப்டம்பர் 9) விளையாட உள்ளது.