இலங்கைக்கு 'ஃபாலோ

இலங்கைக்கு 'ஃபாலோ-ஆன்' கொடுத்த இந்தியா.. எவ்ளோ ரன் முன்னிலை? ஏன் இந்தியா பேட்டிங் செய்யவில்லை?

கொழும்பு: இலங்கைக்கு எதிரான இரண்டாவது டெஸ்ட் போட்டியின் நான்காவது நாள் ஆட்டத்தின் முதல் பகுதியில், இலங்கை அணியை 290 ரன்களுக்குச் சுருட்டிய இந்திய அணி 'ஃபாலோ-ஆன்' கொடுத்துள்ளது. கொழும்பில் மழை அச்சுறுத்தல் நீடித்து வரும் நிலையில், இந்திய அணி விரைவாக வெற்றியை நோக்கி நகரத் திட்டமிட்டுள்ளது.

கொழும்பு சிங்களா ஸ்போர்ட்ஸ் கிளப் மைதானத்தில் நடைபெற்று வரும் இப்போட்டியில், இந்திய அணி முதல் இன்னிங்ஸில் 9 விக்கெட் இழந்து 503 ரன்கள் எடுத்து டிக்ளேர் செய்தது. நேற்று மூன்றாவது நாள் ஆட்டநேர முடிவில் இலங்கை அணி 8 விக்கெட் இழப்பிற்கு 265 ரன்கள் எடுத்திருந்தது. நான்காவது நாள் ஆட்டத்தைத் தொடங்கிய இலங்கையின் சோனல் தினுஷா சிறப்பான ஆட்டத்தை வெளிப்படுத்தி தனது அறிமுக சதத்தைப் பதிவு செய்தார். அவர் 162 பந்துகளில் 8 பவுண்டரிகள் மற்றும் 3 சிக்சர்களுடன் 103 ரன்கள் எடுத்தார்.

மறுமுனையில் பொறுப்புடன் விளையாடிய லஹிரு குமாராவை (12 ரன்கள்) அவுட்டாக்கிய இந்திய அறிமுக வீரர் சரண்ஷ் ஜெயின், சர்வதேச டெஸ்ட் கிரிக்கெட்டில் தனது முதல் விக்கெட்டைப் பதிவு செய்தார். தொடர்ந்து அபாரமாக விளையாடிய சோனல் தினுஷாவையும் தனது சுழலில் வீழ்த்தி இலங்கை இன்னிங்ஸிற்கு முற்றுப்புள்ளி வைத்தார். இலங்கை அணி 290 ரன்களுக்கு அனைத்து விக்கெட்டுகளையும் இழந்தது. இந்திய அணித் தரப்பில் பிரசித் கிருஷ்ணா மற்றும் மானவ் சுதர் தலா 3 விக்கெட்டுகளையும், சரண்ஷ் ஜெயின் 2 விக்கெட்டுகளையும் வீழ்த்தினர்.

இதன் மூலம் இந்திய அணி முதல் இன்னிங்ஸில் 213 ரன்கள் முன்னிலை பெற்றது. மழை அச்சுறுத்தல் மற்றும் குறைவான ஆட்ட நேரத்தை மனதில் கொண்டு, இந்திய கேப்டன் சுப்மன் கில் உடனடியாக இலங்கைக்கு 'ஃபாலோ-ஆன்' வழங்கினார். இதனால் இலங்கை அணி மீண்டும் தனது இரண்டாவது இன்னிங்ஸை விளையாட களம் இறங்கியுள்ளது. எஞ்சிய நாட்களில் மழை பெய்ய வாய்ப்பிருப்பதால், இலங்கை பேட்டிங் வரிசையை விரைவாகச் சுருட்டி இன்னிங்ஸ் வெற்றி பெற இந்திய அணி தீவிரமாகப் போராடி வருகிறது.