IND vs WI: 5வது டி20யில் மழை காரணமாக டாஸ் பாதிப்பு.. பெங்களூருவில் போட்டி நடக்குமா?

IND vs WI: 5வது டி20யில் மழை காரணமாக டாஸ் பாதிப்பு.. பெங்களூருவில் போட்டி நடக்குமா?

பெங்களூரு: இந்தியா மற்றும் மேற்கிந்திய தீவுகள் அணிகளுக்கு இடையே நடைபெறவிருந்த ஐந்தாவது டி20 போட்டிக்கான டாஸ் மழை காரணமாக தாமதமாகியுள்ளது. மைதானத்தில் கனமழை பெய்து வருவதால் ஆட்டம் நிர்ணயிக்கப்பட்ட நேரத்தில் தொடங்குவதில் சிக்கல் ஏற்பட்டுள்ளது.

பெங்களூரில் மாலை 5 மணி வரை பலத்த மழை பெய்த நிலையில், போட்டி நேரத்தை நெருங்கும்போது மழையின் அளவு சற்றே குறைந்திருந்தது. இருப்பினும், டாஸ் போடும் நேரத்திற்கு சில நிமிடங்களுக்கு முன்பு மீண்டும் மழை தீவிரமடைந்தது.

மைதானத்தை சுற்றிலும் அடர்ந்த மேகங்கள் சூழ்ந்து காணப்படுவதால் மழை முழுமையாக நின்ற பின்னரே அடுத்தகட்ட நடவடிக்கைகள் சாத்தியமாகும். மழை அச்சுறுத்தல் காரணமாக இரு அணி வீரர்களும் வழக்கமான நேரத்தை விட தாமதமாக, மாலை 6:20 மணி அளவிலேயே மைதானத்திற்கு வந்தடைந்தனர்.

ஆட்டம் தொடங்குவதற்கு முன்பாக வீரர்களுக்கு உடற்பயிற்சி செய்ய நேரம் தேவைப்படும். இதற்கிடையே, மழை பெய்தபோதிலும் மைதானத்தில் கூடியுள்ள ரசிகர்கள் போட்டி தொடங்கும் என்ற நம்பிக்கையுடன் காத்திருக்கின்றனர்.

மழை நின்றவுடன் போட்டியை விரைவாகத் தொடங்க சின்னசுவாமி மைதானத்தில் உள்ள அதிநவீன சப்-ஏர் வடிகால் அமைப்பு பெரிதும் உதவும். 2017-ஆம் ஆண்டு அமைக்கப்பட்ட இந்த சாதனம், மைதானத்தில் தேங்கும் தண்ணீரை உறிஞ்சி வெளியேற்றும் திறன் கொண்டது.

புல்வெளிக்கு அடியில் அமைக்கப்பட்டுள்ள துளையிடப்பட்ட குழாய் நெட்வொர்க் மூலம் மழைநீரை இந்த அமைப்பு விரைவாக உறிஞ்சுகிறது. இதனால் மழை நின்ற சில நிமிடங்களிலேயே ஈரம் காய்ந்து, மைதானம் ஆட்டத்திற்குத் தயாராகிவிடும் என்பதால் போட்டி விரைவில் தொடங்கும் என எதிர்பார்க்கப்படுகிறது.