இந்த 26 வயது வீரர் மீது அவ்வளவு பயம்.. அவர் விக்கெட்டை வீழ்த்த எதிரணி விரும்பும்

இந்த 26 வயது வீரர் மீது அவ்வளவு பயம்.. அவர் விக்கெட்டை வீழ்த்த எதிரணி விரும்பும்- தினேஷ் கார்த்திக்

இந்தூர்: வெஸ்ட் இண்டீஸ் அணிக்கு எதிரான டி20 போட்டியில் அபிஷேக் சர்மா காட்டிய அதிரடி ஆட்டத்தை இந்திய முன்னாள் விக்கெட் கீப்பர் தினேஷ் கார்த்திக் வெகுவாகப் பாராட்டியுள்ளார். சர்வதேச டி20 போட்டிகளில் எதிரணிகள் வீழ்த்தத் துடிக்கும் முதன்மையான விக்கெட்டாக அபிஷேக் உருவெடுத்துள்ளதாக கார்த்திக் குறிப்பிட்டுள்ளார்.

தொடக்க ஆட்டக்காரர் சஞ்சு சாம்சன் விரைவாக ஆட்டமிழந்த போதிலும், இடதுகை பேட்டரான அபிஷேக் சர்மா 30 பந்துகளில் 69 ரன்கள் குவித்து வெஸ்ட் இண்டீஸ் பந்துவீச்சை சிதறடித்தார். 6 பவுண்டரிகள் மற்றும் 5 சிக்ஸர்கள் அடங்கிய இந்த அதிரடி இன்னிங்ஸ் மூலம், எதிர்கொண்ட பந்துகளின் அடிப்படையில் டி20 சர்வதேச போட்டிகளில் அதிவேகமாக 2000 ரன்களை கடந்த வீரர் என்ற சாதனையை அவர் படைத்தார்.

அபிஷேக் சர்மாவின் அதிரடி பேட்டிங் குறித்து பேசிய தினேஷ் கார்த்திக், "தொடர்ச்சியாக ரன்கள் குவிக்கும் அதேவேளையில் அதிவேகமாக ரன் அடிப்பதே அவரை மற்ற வீரர்களிடமிருந்து வேறுபடுத்திக் காட்டுகிறது. அனைத்து சூழல்களிலும் எதிரணியின் பந்துவீச்சுக்கு அவர் தொடர்ந்து அழுத்தம் கொடுத்து வருகிறார். அபிஷேக் களமிறங்கும்போது எதிரணிகள் பயப்படுகின்றன. அவர் தொடக்க ஆட்டக்காரராக உலக அளவில் மிகப்பெரிய சக்தியாக உருவெடுத்துள்ளார்," என்று தெரிவித்தார்.

"பெரிய போட்டிகளிலும் துணிச்சலாக விளையாடக்கூடிய அதிரடி ஆட்டக்காரர் இந்தியாவுக்குக் கிடைத்துள்ளார். நெருக்கடியான நேரங்களிலும் அவர் நேர்மறையான அணுகுமுறையுடனேயே பெரிய ஷாட்களை அடிக்க முயல்கிறார். தனது அதிரடி ஆட்டத்தோடு பேட்டிங் நுட்பத்தையும் அவர் வளர்த்துக் கொண்டுள்ளார். தற்போதைய ஸ்ட்ரைக் ரேட்டில் தொடர்ச்சியாக ரன்களை குவிக்கும் திறமையை அவர் பெற்றுள்ளார்," எனக் கூறினார்.

இந்திய முன்னாள் கேப்டன் அஜிங்கியா ரஹானேவும் அபிஷேக் சர்மாவின் நிலையான ஆட்டத்தைப் பாராட்டியுள்ளார். இது குறித்து பேசிய அவர், "ரன்கள் குவிக்க அவர் வெவ்வேறு வழிகளைக் கண்டறிவது சிறப்பு வாய்ந்தது. ஏதேனும் ஒரு குறிப்பிட்ட முறையில் திணறினாலும், தனது ஸ்ட்ரைக் ரேட்டைக் குறைக்காமல் ரன் அடிக்கும் வழியை அவர் கண்டறிந்துவிடுகிறார். சுமார் 200 ஸ்ட்ரைக் ரேட்டில் இவ்வளவு நிலையாக பேட்டிங் செய்வது ஆச்சரியமளிக்கிறது," என்று குறிப்பிட்டுள்ளார்.