இந்தாண்டும் கிடைக்கவில்லை அமைதிக்கான நோபல் பரிசு; புலம்பி தவிக்கும் அதிபர் டிரம்ப்

-நமது நிருபர்-

இந்தாண்டும் அமைதிக்கான நோபல் பரிசு கிடைக்கவில்லை என தனது அதிருப்தியை அதிபர் டிரம்ப் வெளிப்படுத்தி இருக்கிறார்.

தமிழ் வம்சாவளியை சேர்ந்த நவநீதம் நவி பிள்ளைக்கு நடப்பாண்டுக்கான அமைதிக்கான நோபல் பரிசு அறிவிக்கப்பட்டு உள்ளது. நடப்பாண்டும் தனக்கு நோபல் பரிசு கிடைக்கவில்லை என தனது அதிருப்தியை, நியூயார்க்கின் சைராகுஸ் நகரில் நடந்த தேர்தல் பிரசாரத்தில் கொட்டி தீர்த்தார். அவர் பேசியதாவது: ஜனநாயகத்திற்கு எதிரானவர்களால் அமைதிக்கான நோபல் பரிசு நிரந்தரமாக மதிப்பு இழந்துவிட்டது.

இதை நாங்கள் மறக்க மாட்டோம் நார்வே. நான் வட மற்றும் தென் கொரியா, ஜப்பான் மற்றும் வட கொரியா, சீனா மற்றும் தைவான் ஆகியவற்றுக்கு இடையே போர்கள் வெடிப்பதைத் தடுக்க உதவினேன். இந்த அவமானகரமான மற்றும் சங்கடமான முடிவு அமைதிக்கான நோபல் பரிசை அறிவிக்கும் குழுவினர் செயல் நார்வே மீது கறையை ஏற்படுத்தியது. இவ்வாறு டிரம்ப் பேசினார்.

பதிவில் குமுறல்!

இது குறித்து சமூக வலைதளத்தில் டிரம்ப் வெளியிட்ட பதிவு: நான் 8 போர்களை முடிவுக்கு கொண்டு வந்துள்ளேன்; இதில் ஏதேனும் ஒரு போரை அடிப்படையில் கொண்டாலே, நோபல் பரிசு வெல்வதற்கு போதுமானதை விட அதிகமானது; நான் ஒரு நோபல் பரிசு அல்ல, 8 அமைதிக்கான நோபல் பரிசுகளை வென்றிருக்க வேண்டும்.

அமெரிக்காவைப் புறக்கணித்துவிட்டு அமைதிக்கான நோபல் பரிசை நவநீதம் நவி என்ற பெண் பெற்றுள்ளார். இந்தப் பெண்ணைப் பற்றி எனக்கு எதுவும் தெரியாது, வேறு யாருக்கும் எதுவும் தெரியாது. சொல்லப்போனால், இஸ்ரேலை இவர் வெளிப்படையாக வெறுக்கிறார் என்பதைத் தவிர, இவரைப் பற்றி யாருக்கும் எதுவும் தெரிந்திருக்க வாய்ப்பில்லை.

இவர் என்ன செய்தார் என்றே எனக்குத் தெரியவில்லை. நான் எட்டுப் போர்களை முடிவுக்குக் கொண்டுவந்தேன்; நான் உதவிய நாடுகளின் அதிபர்கள் மற்றும் பிரதமர்கள் நார்வே நோபல் குழுவிற்கு அனுப்பிய கடிதங்கள் இதற்குச் சான்றாக உள்ளன. ஈரான் மற்றும் ரஷ்யா-உக்ரைன் இடையிலான இரண்டு போர்களையும் முடிவுக்குக் கொண்டுவர நான் தயாராக இருக்கிறேன். இவை மிக வேகமாக நடந்து கொண்டிருக்கின்றன; ஆனால் அவற்றை விடுங்கள், நான் ஏற்கனவே முடிவுக்குக் கொண்டுவந்த அந்த எட்டுப் போர்களில் ஏதேனும் ஒன்றைஅடிப்படையாகக் கொண்டாலே, நோபல் பரிசை வெல்வதற்கு அது போதுமானதை விட அதிகமாக இருந்திருக்கும்.

கூடுதலாக, ஈரான் அணு ஆயுதத்தைப் பெறுவதையும், அதன் மூலம் மத்திய கிழக்கு முழுவதையும், இறுதியில் அதற்கும் அப்பாலும் உள்ள பகுதிகளை அழிப்பதையும் நான் தடுத்தேன். வரலாற்றிலேயே வேறு யாரையும் விட அதிகமான உயிர்களை நான் காப்பாற்றியுள்ளேன். யாருக்கும் அறிமுகமில்லாத ஒரு தாராளவாதக் கொள்கை கொண்ட நபருக்கு இன்று நோபல் பரிசு வழங்கப்பட்டுள்ளது.

நான் தீர்த்து வைத்த போர்கள் எதிலுமே நான் ஐக்கிய நாடுகள் சபையுடன் பேசவில்லை; அவர்களால் எந்த உதவியும் கிடைக்கவில்லை. ஜனநாயகம் மற்றும் நாகரிகத்திற்கு எதிரான தீவிரக் கொள்கைவாதிகள் சிலரால், நோபல் அமைதிப் பரிசு என்றென்றும் மதிப்பிழக்கச் செய்யப்பட்டுள்ளது. இவ்வாறு டிரம்ப் கூறியுள்ளார்.