மகளிருக்கு இலவசம்.. இந்தியா

மகளிருக்கு இலவசம்.. இந்தியா - ஜிம்பாப்வே போட்டியை காண மைதானம் வருமாறு பெண்களுக்கு அழைப்பு

ராய்ப்பூர்: இந்தியா மற்றும் ஜிம்பாப்வே மகளிர் அணிகளுக்கு இடையே ராய்ப்பூரில் நடைபெறும் 3 போட்டிகள் கொண்ட டி20 கிரிக்கெட் தொடரை, பெண் ரசிகர்கள் அனைவரும் மைதானத்தில் இலவசமாக அமர்ந்து பார்க்கலாம் என அதிரடியாக அறிவிக்கப்பட்டுள்ளது. சத்தீஸ்கர் முதலமைச்சர் விஷ்ணு தியோ சாய் வழங்கிய ஆலோசனையை ஏற்று, சத்தீஸ்கர் மாநில கிரிக்கெட் சங்கம் இந்த அசத்தலான சலுகையை அறிவித்துள்ளது.

ராய்ப்பூரில் உள்ள ஷஹீத் வீர் நாராயண் சிங் சர்வதேச கிரிக்கெட் மைதானத்தில் அக்டோபர் 16, 18 மற்றும் 20 ஆகிய தேதிகளில் போட்டிகள் நடைபெறுகின்றன. 3 போட்டிகளுமே இரவு 7 மணிக்கு தொடங்க உள்ளன. இந்த போட்டிகளை நேரில் பார்க்க வருமாறு கிரிக்கெட் சங்கத் தலைவர் மோகன் தாஸ் உள்ளிட்ட நிர்வாகிகள் முதலமைச்சர் விஷ்ணு தியோ சாயை நேரில் சந்தித்து அழைப்பிதழ் கொடுத்தனர். அப்போது பேசிய முதல்வர், பெண்களுக்கு டிக்கெட் கட்டணத்தை முற்றிலும் ரத்து செய்யலாம் என யோசனை தெரிவித்தார். முதல்வரின் யோசனையை ஏற்று பெண் ரசிகர்களுக்கு இலவச அனுமதி வழங்கப்படுவதாக சங்கம் தனது சமூக வலைதள பக்கங்களில் அதிகாரப்பூர்வமாக அறிவித்தது.

தற்போது நவராத்திரி விழா கொண்டாடப்பட்டு வரும் வேளையில், இந்த முடிவு பண்டிகை காலத்திற்கு மேலும் உற்சாகம் சேர்க்கும் என தெரிவிக்கப்பட்டுள்ளது. மைதானத்திற்கு அதிக எண்ணிக்கையில் பெண்கள் குடும்பத்துடன் திரண்டு வந்து இந்திய அணிக்கு உற்சாகக் குரல் கொடுக்க வேண்டும் என கிரிக்கெட் சங்கம் வேண்டுகோள் விடுத்துள்ளது. மேலும், ராய்ப்பூர் மைதானத்தில் மகளிர் சர்வதேச கிரிக்கெட் போட்டி ஒன்று நடத்தப்படுவது இதுவே முதல்முறையாகும்.

இந்தத் தொடர் பல புதுமைகளைக் கொண்டுள்ளது. இந்திய மகளிர் அணியின் முழுநேர கேப்டனாக நட்சத்திர வீராங்கனை ஸ்மிருதி மந்தனா தனது பயணத்தை இங்கிருந்து தொடங்குகிறார். மறுபுறம், ஜிம்பாப்வே மகளிர் அணி இந்திய மண்ணில் முதல்முறையாக இருதரப்பு கிரிக்கெட் தொடரில் மோதுகிறது. ராய்ப்பூரில் டி20 தொடர் நிறைவடைந்ததும், இரு அணிகளும் குஜராத்தின் வதோதரா நகருக்குப் பயணமாக உள்ளன. அங்கு அக்டோபர் 23 முதல் 28 வரை 3 ஒருநாள் போட்டிகள் நடைபெற உள்ளன.