தமிழக அமைச்சரவையிலிருந்து விசிகவை வெளியேற்ற முயற்சி: திருமாவளவன்

சென்னை: தமிழக அமைச்சரவையிலிருந்து விசிகவை வெளியேற்ற முயற்சிகள் நடைபெறுவதாக அக்கட்சியின் தலைவர் திருமாவளவன் தெரிவித்துள்ளார்.

இடைத்தேர்தல் வெற்றிக்குப் பாமகதான் காரணம் எனக்கூறுவது அமைச்சரவையிலிருந்து விசிகவை வெளியேற்றுவதற்கான கதை என்றும் அவர் கூறியுள்ளார்.

இதுகுறித்து ஃபேஸ்புக்கில் காணொளி ஒன்றை அவர் பதிவிட்டுள்ளார்.

அதில், இரண்டு தொகுதி இடைத்தேர்தல் வெற்றிக்கும் விசிகவின் பங்களிப்பு மிகவும் முக்கியத்துவம் வாய்ந்தது என்பதை மனசாட்சியுள்ள அனைவரும் அறிவர். ஆனால் இதுகுறித்து விவாதிப்பவர்கள் வேண்டுமென்றே திட்டமிட்டு விசிகவின் முக்கியத்துவத்தை மறைக்க முயற்சி செய்கின்றனர் என்று அவர் குறிப்பிட்டுள்ளார்.

“முதலிடத்தில் இருந்த அதிமுக 3வது இடத்துக்குச் சென்றுள்ளது. அதைக் குறித்துகூடப் பேசாதவர்கள், தவெக வெற்றிக்கு விசிக காரணம் இல்லை, பாமகதான் காரணம் என்ற கதையைக் கட்டமைக்கின்றனர். அவர்களின் நோக்கம் எப்படியாவது விசிகவைத் தவெக கூட்டணியில் இருந்தும் அமைச்சரவையில் இருந்தும் வெளியேற்ற வேண்டும் என்பதே. திமுக கூட்டணியில் இருந்தபோதும் இதே முயற்சிகளைச் செய்தனர். அதையே தற்போதும் கையாளுகின்றனர். அதிமுகவின் வாக்குகள் எப்படி திமுகவுக்கு வராதோ அதேபோல விசிக அங்கம் வகிக்கும் கூட்டணிக்குப் பாமகவின் வாக்குகள் கிடைக்காது.

“தவெகவுக்குப் பாமக ஆதரவு அளிக்கப் போகிறது, தவெக கூட்டணியில் இணைந்து அமைச்சரவையில் இடம்பெறப் போகிறது எனப் பரப்பினர். இப்படி ஓர் ஆசையைத் தூண்டுவதன் மூலம் பாமகவின் வாக்குகள் திமுகவுக்குச் செல்லாமல் கணிசமான வாக்குகள் தவெகவுக்குச் செல்லவேண்டும் என்ற உள்நோக்கத்துடனும் விசிகவினரை சோர்வடையச் செய்ய வேண்டும் என்பதற்காகவும் பரப்பியுள்ளனர்,” என்றும் அவர் கூறியுள்ளார்.