2027 உலககோப்பையில் இந்த 32 வயது இந்திய வீரர் விளையாடுவது சந்தேகமே.. கையிப் கருத்து

2027 உலககோப்பையில் இந்த 32 வயது இந்திய வீரர் விளையாடுவது சந்தேகமே.. கையிப் கருத்து

மும்பை: 2027 ஆம் ஆண்டு நடைபெறவுள்ள ஒருநாள் உலகக் கோப்பை தொடரில் ஹர்திக் பாண்டியா விளையாடுவது குறித்து இந்திய அணியின் முன்னாள் வீரர் முகமது கைப் சந்தேகம் தெரிவித்துள்ளார். ஆப்கானிஸ்தான் ஒருநாள் தொடரைத் தவறவிட்ட இந்த நட்சத்திர ஆல்-ரவுண்டர், இங்கிலாந்துக்கு எதிரான தொடரிலிருந்தும் விலகியுள்ளார். ஹர்திக்கின் உடற்தகுதிப் பிரச்சினைகள் காரணமாக, 2027 உலகக் கோப்பையில் அவர் விளையாடுவதை தம்மால் உறுதிப்படுத்த முடியாது என்று கைப் தெரிவித்துள்ளார். மேலும், ஹர்திக்கின் காயங்கள் குறித்து அணி நிர்வாகம் வெளிப்படைத்தன்மையுடன் நடந்து கொள்ளவில்லை என்றும் அவர் விமர்சித்துள்ளார்.

இது குறித்து பேசிய கையிப்"அவர் விஷயத்தில் என்னால் எந்த உத்தரவாதமும் அளிக்க முடியாது. அவருடைய நிலைமையை என்னால் புரிந்து கொள்ளவே முடியவில்லை. அவர் ஒரு சிறந்த மேட்ச் வின்னர். தற்போதைய வீரர்களில் ஆல்-ரவுண்டராக அவருக்கு ஈடாக யாரும் இல்லை. இது அவருக்கும் தெரியும். ஆனால் அவரது உடல்நிலை மிகவும் பலவீனமாக உள்ளது.

2023-லும் அவர் காயமடைந்தார், அதன் பிறகு அவரது உடற்தகுதி முன்பு போல இல்லை. அவரது காயம் குறித்தோ அல்லது அதற்கான சரியான காரணங்கள் குறித்தோ எந்தப் பேச்சும் இல்லை. அதிகாரப்பூர்வமாக என்ன காரணம் சொல்லப்படுகிறது என்று எனக்குத் தெரியவில்லை. உங்களுக்குத் தெரிந்தால் சொல்லுங்கள். எங்களுக்கு ஊடகங்கள் மூலமாக மட்டுமே தகவல்கள் கிடைக்கின்றன," என்று கைப் தனது யூடியூப் பக்கத்தில் தெரிவித்துள்ளார்.

"உண்மையில் என்ன நடந்தது என்பதைத் தெரிந்துகொள்ள ரசிகர்களுக்கும் உரிமை உள்ளது, இதில் கூடுதல் வெளிப்படைத்தன்மை தேவை. ஹர்திக்கின் முழு வாழ்க்கையிலும் இதே நிலைதான் நீடிக்கிறது. அவருக்கு என்ன காயம் ஏற்பட்டது, ஏன் அவர் போட்டிகளில் விளையாடுவதில்லை என்பது குறித்து எப்போதும் கேள்விகள் எழுந்து கொண்டே இருக்கின்றன," என்றும் அவர் மேலும் கூறினார்.

ஐபிஎல் 2026-ன் போது ஹர்திக்கிற்கு முதுகுவலி ஏற்பட்டது. அதன் தொடர்ச்சியான பரிசோதனையின் போது அவருக்குத் தொடைப் பகுதியில் (quadriceps) காயம் ஏற்பட்டது கண்டறியப்பட்டது. தற்போது பெங்களூருவில் உள்ள பிசிசிஐ-யின் முற்போக்கு மையத்தில் (Centre of Excellence) அவர் உடற்பயிற்சிகளை மேற்கொண்டு வருகிறார். இருப்பினும், இங்கிலாந்து ஒருநாள் தொடருக்கான அணி அறிவிக்கப்பட்டபோது அவரது உடற்தகுதி நிலை குறித்து எந்தத் தகவலும் குறிப்பிடப்படவில்லை.

இதற்கிடையில், இங்கிலாந்து சுற்றுப்பயணத்திற்கான அணியில் யாஷஸ்வி ஜெய்ஸ்வாலின் பெயர் இடம் பெறவில்லை. அவருக்குப் பதிலாக இஷான் கிஷன் மாற்று விக்கெட் கீப்பராகவும், நடுத்தர வரிசையில் பேட்டிங் செய்யக்கூடியவராகவும் தேர்வு செய்யப்பட்டுள்ளார் என்பதை முகமது கைப் சுட்டிக்காட்டியுள்ளார். இருப்பினும், ஜெய்ஸ்வாலுக்கு விரைவில் வாய்ப்பு கிடைக்கும் என்றும், அவர் இந்தியாவின் மூன்று வடிவ கிரிக்கெட்டிலும் விளையாடுவார் என்றும் கைப் நம்பிக்கை தெரிவித்துள்ளார்.

"ஜெய்ஸ்வால் கண்டிப்பாக விளையாடுவார். அவர் அனைத்து வடிவ போட்டிகளிலும் விளையாடக்கூடிய வீரராக உருவெடுப்பார். அவருக்கான நேரமும் வரும். தேர்வு குழுவினரால் 15 வீரர்களை மட்டுமே தேர்வு செய்ய முடியும் என்று அஜித் அகர்கர் கூறியதை நான் ஒப்புக்கொள்கிறேன். நம்மிடம் ஏராளமான சிறந்த வீரர்கள் இருப்பதால், சிலர் இவ்வாறான வாய்ப்புகளை இழக்க நேரிடும். அவர்கள் ஜெய்ஸ்வால் அல்லது இஷான் கிஷன் ஆகிய இருவரில் ஒருவரைத் தேர்ந்தெடுக்க வேண்டியிருந்தது.

கிஷன் நடுத்தர வரிசையிலும் பேட்டிங் செய்ய முடியும் என்பதால் அவருக்கு முன்னுரிமை வழங்கப்பட்டது. ஜெய்ஸ்வால் ஒரு சிறந்த தொடக்க ஆட்டக்காரர். மேலும் கிஷன் மாற்று விக்கெட் கீப்பராகவும் செயல்பட முடியும். அத்துடன் கௌதம் கம்பீருக்கும் கிஷனை அணியில் சேர்க்க விருப்பம் உள்ளது. அவரது தற்போதைய ஃபார்மும் நன்றாக இருப்பதால், இந்த முடிவை நான் வரவேற்கிறேன். ஜெய்ஸ்வால் இன்னும் சில காலம் காத்திருக்க வேண்டும்," என்று அவர் கூறினார். ஆப்கானிஸ்தானுக்கு எதிராக சென்னையில் நடைபெற்ற கடைசி ஒருநாள் போட்டியில் ஜெய்ஸ்வால் ஆட்டமிழக்காமல் 110 ரன்கள் குவித்து சதம் விளாசியது குறிப்பிடத்தக்கது.

ரோஹித் சர்மாவின் உலகக் கோப்பை கனவு மற்றும் உடற்தகுதி

சமீபகாலமாக ரோஹித் சர்மாவின் உடற்தகுதி குறித்தும், அவர் 2027 உலகக் கோப்பையில் விளையாடுவாரா இல்லையா என்பது குறித்தும் விவாதங்கள் எழுந்துள்ளன. ஐபிஎல் 2026-ன் போது ரோஹித் காயங்களால் அவதிப்பட்டார். இருப்பினும், அவர் ஓய்வெடுக்காமல் ஆப்கானிஸ்தான் ஒருநாள் தொடரில் விளையாடினார். ரோஹித் தொடர்ந்து விளையாட வேண்டும் என்று கைப் கருதினாலும், பலவீனமான அணிகளுக்கு எதிராக விளையாடி ரன்கள் குவிக்கத் தவறினால் ரோஹித் போன்ற மூத்த வீரர்கள் கடுமையான விமர்சனங்களை எதிர்கொள்ள நேரிடும் என்றும் அவர் எச்சரித்துள்ளார்.

"ரோஹித் விளையாட விரும்புகிறார். அவர் நினைத்திருந்தால் ஐபிஎல் காயத்தைக் காரணம் காட்டி ஆப்கானிஸ்தான் தொடரில் ஓய்வெடுத்திருக்கலாம். ஆனால் அவர் விளையாட விரும்பினார். தற்போது இலங்கை மற்றும் வங்கதேச அணிகளுக்கு எதிராக விளையாடும்போது, இழப்பதற்கு நிறைய விஷயங்கள் உள்ளன. அவர் சதம் அடித்தால், அவை பலவீனமான அணிகள் என்று கூறி யாரும் அதை மதிக்க மாட்டார்கள். ஆனால் அவர் ரன்கள் எடுக்காமல் ஆட்டமிழந்தால் (ஆப்கானிஸ்தானுக்கு எதிராக நடந்தது போல), இங்கேயே அவரால் ரன் குவிக்க முடியவில்லையே, உலகக் கோப்பையில் என்ன செய்வார் என்ற கேள்விகள் எழும். இத்தகைய அணிகளுக்கு எதிராக விளையாடும்போது இழப்புகள் அதிகம். ஆனால் அவர் களத்தில் கூடுதல் நேரம் பேட்டிங் செய்ய விரும்பினால், கண்டிப்பாக விளையாட வேண்டும்," என்று கைப் கூறினார்.

2027 உலகக் கோப்பையில் குர்னூர் ப்ரார்?

உலகக் கோப்பை குறித்து மேலும் பேசிய முகமது கைப், இளம் வேகப்பந்து வீச்சாளர் குர்னூர் ப்ரார் 2027 உலகக் கோப்பை அணியில் இடம் பெற வாய்ப்புள்ளது என்றார். இங்கிலாந்துக்கு எதிரான ஒருநாள் தொடருக்கான இந்திய அணியில் குர்னூர் சேர்க்கப்பட்டுள்ளார். இங்கிலாந்தில் அவர் சிறப்பாகச் செயல்பட்டால், அவருக்குத் தொடர்ந்து வாய்ப்புகள் கிடைப்பதுடன் உலகக் கோப்பை அணியிலும் இடம் கிடைக்க வழிவகுக்கும் என்று கைப் கணித்துள்ளார்.

"2027 உலகக் கோப்பைக்காக குர்னூர் ப்ராரை உருவாக்க அவர்கள் விரும்புகிறார்கள் என்று நான் நினைக்கிறேன். அவர் மீது அதிக கவனம் செலுத்தப்படும். கம்பீருக்கு அவரைப் பிடிக்கும், கில்லுக்கும் அவரை நன்றாகத் தெரியும், தேர்வாளர்களும் அதே எண்ணத்தில் உள்ளனர். அவரது உயரம் மற்றும் கூடுதல் பவுன்ஸ் செய்யும் திறன் அவருக்குச் சாதகமாக உள்ளது. அவர் இங்கிலாந்தில் சிறப்பாகச் செயல்பட்டால், உலகக் கோப்பையில் விளையாடுவதை நாம் பார்க்கலாம்.

அவர் ஒரு வித்தியாசமான பந்துவீச்சாளர் மற்றும் பந்தை உயரமாக ரிலீஸ் செய்யும் திறன் கொண்டவர், இது தென்னாப்பிரிக்க மண்ணில் மிகவும் பயனுள்ளதாக இருக்கும். தற்போதைய தேர்வுக்குழுவும் பயிற்சியாளரும் எப்போதும் எதிர்பாராத ஒரு புதிய வீரரை அணிக்குள் கொண்டு வருகிறார்கள். குர்னூர் தனது திறமையை நிரூபித்தால், உலகக் கோப்பை அணியில் அவரது பெயர் நிச்சயம் இருக்கும்," என்றார். ஆப்கானிஸ்தானுக்கு எதிரான மூன்று ஒருநாள் போட்டிகளில் குர்னூர் சிறப்பாகப் பந்துவீசி, 19.42 சராசரியிலும் 5.95 எகானமி ரேட்டிலும் 7 விக்கெட்டுகளைக் கைப்பற்றி அசத்தியுள்ளார்.