ஆசியான் மின்னிலக்க ஒப்பந்தம்: சிங்கப்பூர் தலைமை & செயற்கை நுண்ணறிவு

2027ல் ஆசியான் வட்டாரக் கூட்டமைப்பின் தலைமைப் பொறுப்பை சிங்கப்பூர் ஏற்கும் போது, ​​செயற்கை நுண்ணறிவை ஒரு முக்கிய முன்னுரிமையாகக் கொண்டு, ஆசியானின் வரலாற்றுச் சிறப்புமிக்க மின்னிலக்கப் பொருளியல் ஒப்பந்தத்தை அது உண்மையாக்கும் என்று பிலிப்பீன்ஸ் அதிபர் ஃபெர்டினாண்ட் மார்கோஸ் ஜூனியர் நம்புகிறார்.

மணிலாவின் தலைமையில் நவம்பர் மாதம் ஆசியான் முறையாகக் கையெழுத்திடும் என எதிர்பார்க்கப்படும் மின்னிலக்கப் பொருளியல் கட்டமைப்பு ஒப்பந்தம், தென்கிழக்கு ஆசியா முழுவதும் நெருக்கமான மின்னிலக்க ஒருங்கிணைப்பிற்கு அடித்தளமிடும் என்று மார்கோஸ் கூறினார்.

“மின்னிலக்கப் பொருளியல் கட்டமைப்பு ஒப்பந்தமும் அதற்கான செயல்திட்டமும் நடைமுறையில் உள்ள நிலையில், சிங்கப்பூர் இந்தப் பொறுப்பை ஏற்கும் என்று நான் நம்புகிறேன். அவர்கள் இந்தப் பொறுப்பை ஏற்றுக்கொண்டு அதைச் சிறப்பாகச் செயல்படுத்துவார்கள் என்பதும் எனக்குத் தெரியும்,” என்று அவர் அக்டோபர் 8ஆம் தேதி ஸ்ட்ரெய்ட்ஸ் டைம்ஸ் நாளிதழுக்கு அளித்த பிரத்தியேக நேர்காணலில் தெரிவித்தார்.

ஆசியான் மற்றும் உலகின் பிற நாடுகளுடனான அதன் உறவுகளுக்கு, குறிப்பாக செயற்கை நுண்ணறிவுத் துறையில், இந்த ஒப்பந்தத்தை ‘வெறும் ஒரு வழிகாட்டித் திட்டமாக மட்டும் இல்லாமல்’ மேம்படுத்துவதே இதன் நோக்கம் என்று அவர் கூறினார்.

பிலிப்பீன்சின் முன்னாள் அதிபர் ஃபெர்டினாண்ட் மார்கோஸ் சீனியரின் 69 வயதான மகன், அக்டோபர் 7 முதல் 11ஆம் தேதி வரை ஐந்து நாள் பணி நிமித்தமாக சிங்கப்பூரில் இருக்கிறார். இந்தப் பயணத்தின் போது, ​​இரு நாடுகளுக்கும் இடையிலான பொருளியல் ஒத்துழைப்பை வலுப்படுத்துவதற்காக அவர் அரசியல் மற்றும் வர்த்தகத் தலைவர்களைச் சந்தித்து வருகிறார்.

செயற்கை நுண்ணறிவைக் கையாளுதல்

ஆசியான் உறுப்பு நாடுகளில் ஏதேனும் ஒன்றின் ஓராண்டுத் தலைமைப் பதவிக் காலத்திற்குப் பிறகும் வட்டார முன்னெடுப்புகள் தொடர்வதை உறுதி செய்வதன் முக்கியத்துவம் குறித்து பிரதமர் லாரன்ஸ் வோங்குடன் தாம் விவாதித்ததாக மார்கோஸ் கூறினார்.

மின்னிலக்க மயமாக்கல், செயற்கை நுண்ணறிவு ஆகிய துறைகளில் வட்டார அளவில் முன்னணியில் திகழும் சிங்கப்பூர், இதனைச் செயல்படுத்துதலின் அடுத்த கட்டத்திற்குத் தலைமை தாங்கச் சிறந்த நிலையில் உள்ளதாக மார்கோஸ் கூறினார்.

“தற்போது மிக முக்கியமான மற்றும் தவிர்க்க முடியாத ஒரு பெரிய விஷயமாக செயற்கை நுண்ணறிவு உருவெடுத்துள்ளது என்பதை இரு நாடுகளும் அறிவோம். அதாவது, அதை எப்படிக் கையாள்வது, அதன் மூலம் எவ்வாறு பயனடைவது, அதிலுள்ள ஆபத்துகளிலிருந்து எவ்வாறு பாதுகாத்துக்கொள்வது என்பதே அந்த முக்கிய விவகாரமாகும்,” என்று அவர் விவரித்தார்.

இவையும் உங்களுக்குப் பிடிக்கலாம்

ஆசியான் பொருளியல்களுக்கு இடையிலான வர்த்தகத்தை மேம்படுத்த, வட்டார நிதி, வர்த்தக மையமாகத் திகழும் தனது நிலையை சிங்கப்பூர் பயன்படுத்திக்கொள்ளும் என்றும் அவர் நம்பிக்கை தெரிவித்தார்.

மியன்மார் பற்றி கருத்துரைத்த திரு மார்கோஸ், கடந்த ஐந்து ஆண்டுகளாக நடைபெற்று வரும் உள்நாட்டுப் போரை முடிவுக்குக் கொண்டுவருவதில் ஆசியான் அமைப்பு செயலற்றதாக இருப்பதாக விமர்சனங்கள் எழுந்துள்ள போதிலும், அந்நாட்டின் ராணுவ ஆட்சியைப் பேச்சுவார்த்தைக்குக் கொண்டுவருவதில் ஓரளவு முன்னேற்றம் ஏற்பட்டுள்ளதாகத் தெரிவித்துள்ளார்.

தென் சீனக் கடல் போன்ற விவகாரங்களில் சீனா மீதான பிலிப்பீன்சின் நிலைப்பாடு, அதன் சக ஆசியான் உரிமை கோரும் நாடுகளின் நிலைப்பாட்டுடன் ஒத்துப்போகிறது என்று திரு மார்கோஸ் கூறினார். மேலும், அதன் இந்த உறுதியான அணுகுமுறை, அவ்வாட்டரத்தில் அந்நாட்டைத் தனித்துவிடக்கூடும் என்ற கருத்துகளையும் அவர் நிராகரித்தார்.