📅 Tuesday, 17 November 2026 IST | கார்த்திகை 1, பராபவ வருடம்
Tamilzha Alt Logo Text சார்பற்ற நடுநிலைச் செய்திகள்
முக்கிய செய்திகள்
Latest News July 21, 2026 09:34 PM

"எனக்கு துணை கேப்டன் பதவி சும்மா கொடுக்கல.. அதிரடியாக ஆடி விக்கெட்டை இழக்க முடியாது"

"எனக்கு துணை கேப்டன் பதவி சும்மா கொடுக்கல.. அதிரடியாக ஆடி விக்கெட்டை இழக்க முடியாது"

"எனக்கு துணை கேப்டன் பதவி சும்மா கொடுக்கல.. அதிரடியாக ஆடி விக்கெட்டை இழக்க முடியாது"- திலக் வர்மா

ஹராரே: இந்திய டி20 அணியின் துணை கேப்டன் திலக் வர்மா, தனது பேட்டிங் ஸ்ட்ரைக் ரேட் குறித்த விமர்சனங்களுக்குப் பதிலளித்துள்ளார். தனது பேட்டிங் அணுகுமுறை தனிப்பட்ட சாதனைகளுக்காக அல்லாமல், அணியின் தேவையை அடிப்படையாகக் கொண்டே அமைகிறது என்று அவர் விளக்கியுள்ளார்.

கடந்த சில ஆண்டுகளில் திலக்கின் ஸ்ட்ரைக் ரேட் குறிப்பிடத்தக்க அளவு குறைந்துள்ளது. 2024 ஆம் ஆண்டு வரை கிட்டத்தட்ட 180 ரன்களாக இருந்த அவரது ஸ்ட்ரைக் ரேட், தற்போது சுமார் 140 ஆகக் குறைந்துள்ளது. இது டி20 போட்டிகளில் தொடர்ந்து தாக்கத்தை ஏற்படுத்துவதில் அவருக்குப் பின்னடைவை ஏற்படுத்தியுள்ளது.

குறிப்பாக, சுழற்பந்து வீச்சுக்கு எதிராக அவர் தடுமாறுவதால், சுழற்பந்து வீச்சாளர்களை அவர் எதிர்கொள்வதைத் தவிர்க்கும் வகையில் அணி நிர்வாகம் அவரது பேட்டிங் வரிசையை இறக்கி, அவரை ஒரு ஃபினிஷர் பொறுப்பில் விளையாட வைக்கிறது.

இது குறித்து பேசிய அவர், "இந்த விளையாட்டில், சூழ்நிலைகளுக்கு ஏற்ப வெவ்வேறு வரிசைகளில் பேட்டிங் செய்ய வேண்டியிருக்கும். குறிப்பாக இதுபோன்ற கடினமான ஆடுகளங்களில் விளையாடுவது எளிதானது அல்ல. அணியின் வெற்றிக்காக என்ன தேவைப்படுகிறதோ, அதைச் செய்யவே நான் எப்போதும் விரும்புகிறேன். நிதானமாக விளையாடி ரன் சேர்க்க வேண்டும் என்றால், விக்கெட்டைத் தக்கவைத்து விளையாடுவேன்."

"அதிரடியாக விளையாட வேண்டும் என்றால், அதற்கேற்ப அதிரடியில் இறங்குவேன். என்னால் முதல் பந்திலிருந்தே அதிரடியாக விளையாட முடியும். ஆனால், அதே நேரத்தில் நான் எனது நாட்டுக்காக விளையாடுகிறேன், எனவே என் மீது கூடுதல் பொறுப்புகள் உள்ளன. அணியின் அப்போதைய நிலை என்ன? இறுதிவரை களத்தில் நின்று அணியை வெற்றிப் பாதைக்கு அழைத்துச் செல்ல வேண்டும் என்றால், அதற்கேற்ப எங்கள் திட்டங்கள் தொடர்ந்து மாறும்," என்று அவர் கூறினார்.

"உங்களுடைய பெயருக்கு முன்னால் துணை கேப்டன் என்ற பதவி இருக்கும்போது, அணி நிர்வாகம் உங்களை நம்பியே அந்தப் பொறுப்பை வழங்குகிறது. எனவே, நிர்வாகம் என் மீது வைத்துள்ள நம்பிக்கையையும் பொறுப்பையும் முழுமையாக ஏற்றுக்கொண்டு, அதற்கேற்பவே நான் விளையாடுகிறேன்," என்று அவர்கூறினார்.

"கடந்த தொடர்களை நீங்கள் கவனித்தால், அயர்லாந்து முதல் இங்கிலாந்து வரை, பவர்பிளேயிலேயே நாங்கள் நான்கு முதல் ஐந்து விக்கெட்டுகளை இழந்துள்ளோம். அத்தகைய இக்கட்டான சூழ்நிலையில், களமிறங்கிய உடனே பந்துகளை விளாசி விக்கெட்டை இழப்பது எந்த வகையிலும் சரியாக இருக்காது," என்று திலக் கூறினார்.

"கடந்த இரண்டு ஆண்டுகளில், நாம் ஆசிய ஆடுகளங்களிலேயே அதிகப் போட்டிகளில் விளையாடினோம். ஆனால், இரண்டு ஆண்டுகளுக்குப் பிறகு நேரடியாக வெளிநாட்டு ஆடுகளங்களில், அதுவும் ஒரு வலுவான அணிக்கு எதிராக விளையாடுவது சவாலானது. இங்கிலாந்து மிகவும் பலம் வாய்ந்த அணி. அவர்கள் அரையிறுதியில் எவ்வளவு சிறப்பாக விளையாடினார்கள் என்பதை நாம் பார்த்தோம்," என்று கூறினார்.