FIFA: இரக்கமே இல்லாமல் ஈராக்கை துவைத்து எடுத்த செனகல்.. உலகக்கோப்பை வரலாற்றில் புதிய சாதனை
FIFA: இரக்கமே இல்லாமல் ஈராக்கை துவைத்து எடுத்த செனகல்.. உலகக்கோப்பை வரலாற்றில் புதிய சாதனை
நியூயார்க்: ஃபிஃபா உலகக்கோப்பை 2026 கால்பந்து தொடரின் குரூப் ஐ பிரிவின் கடைசி லீக் போட்டியில் செனகல் அணி 5-0 என்ற கோல் கணக்கில் ஈராக்கை வீழ்த்தி அபார வெற்றி பெற்றது. தொடர் தோல்விகளுக்குப் பின் இப்போட்டியில் கம்பீரமாக மீண்டெழுந்த செனகல், உலகக்கோப்பை வரலாற்றில் தனது மிகப்பெரிய வெற்றியைப் பதிவு செய்து, ரவுண்ட் ஆஃப் 32 சுற்றுக்கு முன்னேறும் வாய்ப்பை தக்க வைத்துக் கொண்டுள்ளது.
டொராண்டோ மைதானத்தில் நடைபெற்ற இப்போட்டியின் 4-வது நிமிடத்திலேயே செனகலின் ஹபீப் தியாரா முதல் கோல் அடித்து அணியை முன்னிலை பெறச் செய்தார். ஆட்டத்தின் தொடக்கத்திலேயே ஈராக் அணிக்கு பெரும் பின்னடைவு ஏற்பட்டது. செனகல் கேப்டன் சாடியோ மானேவை கோல் அடிக்க விடாமல் தடுத்து நிறுத்தியதற்காக, ஈராக் டிஃபெண்டர் ரெபின் சுலகாவுக்கு நடுவர் ஆண்டனி டெய்லர் சிவப்பு அட்டை காட்டினார். இதனால் ஈராக் அணி எஞ்சிய 75 நிமிடங்களுக்கும் மேலாக 10 வீரர்களுடன் மட்டுமே விளையாட வேண்டிய கட்டாயத்திற்குத் தள்ளப்பட்டது.
முதல் பாதியில் ஈராக் அணி மேற்கொண்டு கோல் விழாமல் தடுத்த போதிலும், இரண்டாவது பாதியில் செனகல் அணியின் கோல் மழை பொழிந்தது. ஆட்டத்தின் 56-வது நிமிடத்தில் இஸ்மைலா சார் தனது 4-வது உலகக்கோப்பை கோலை அடித்து, உலகக்கோப்பை தொடரில் செனகல் நாட்டின் அதிக கோல் அடித்த வீரர் என்ற சாதனையைப் படைத்தார்.
இதனைத் தொடர்ந்து, மாற்று வீரராகக் களமிறங்கிய பேப் கேயே அடுத்தடுத்து இரண்டு அபாரமான லாங்-ரேஞ்ச் கோல்களை அடித்து அசத்தினார். ஆட்டத்தின் இறுதி நேரத்தில் இலிமான் நதியாயே அணியின் 5-வது கோலை அடித்தார். இப்போட்டியில் இஸ்மைலா சார், பேப் கேயே மற்றும் இலிமான் நதியாயே ஆகிய மூவரும் தலா ஒரு கோல் மற்றும் ஒரு அசிஸ்ட் செய்து அசத்தினர். இதற்கு முன் 2014 உலகக்கோப்பையில் பிரேசிலுக்கு எதிரான 7-1 வெற்றியில் ஜெர்மனி அணி மட்டுமே இத்தகைய சாதனையைப் படைத்திருந்தது.
மேலும், ஆண்கள் உலகக்கோப்பை வரலாற்றில் ஒரு போட்டியில் 5 கோல்களை அடித்த முதல் ஆப்பிரிக்க நாடு என்ற புதிய வரலாற்றுச் சாதனையை செனகல் படைத்துள்ளது. குரூப் ஐ பிரிவில் பிரான்ஸ் மற்றும் நார்வே அணிகளுக்கு அடுத்தபடியாக 3-வது இடத்தை செனகல் பிடித்துள்ளது. பிற அணிகளின் போட்டி முடிவுகளின் அடிப்படையில், சிறந்த 3-வது இடத்தைப் பிடிக்கும் 8 அணிகளில் ஒன்றாக செனகல் அடுத்த சுற்றுக்கு தகுதி பெற வாய்ப்புள்ளது.