FIFA உலககோப்பை கால்பந்து.. ஜெர்மனியை கதறவிட்ட ஐவரி கோஸ்ட்.. கடைசியில் நடந்த டுவிஸ்ட்

FIFA உலககோப்பை கால்பந்து.. ஜெர்மனியை கதறவிட்ட ஐவரி கோஸ்ட்.. கடைசியில் நடந்த டுவிஸ்ட்

டொராண்டோ: உலககோப்பை கால்பந்த தொடரில் ஐவரி கோஸ்ட் அணிக்கு எதிரான பரபரப்பான லீக் ஆட்டத்தில் ஜெர்மனி அணி த்ரில் வெற்றி பெற்றது. கனடாவின் டொராண்டோநகரில் நடைபெற்ற இந்த ஆட்டத்தில் மாற்று வீரராக களம் இறங்கிய டெனிஸ் உந்தாவ், போட்டியின் 94-வது நிமிடத்தில் அடித்த பரபரப்பான வெற்றி கோல் மூலம் ஜெர்மனியின் புதிய ஹீரோவாக உருவெடுத்துள்ளார்.

இந்த கோல் ஐவரி கோஸ்ட் அணிக்கு எதிரான ஜெர்மனியின் வெற்றியை முழுமையாக்கியதோடு, உலகக் கோப்பையின் நாக் அவுட் சுற்றுக்கான அவர்களின் இடத்தையும் உறுதி செய்துள்ளது.நான்கு முறை உலகக் கோப்பையை வென்ற ஜெர்மனி அணி, ஆட்டத்தின் 30-வது நிமிடத்தில் ஐவரி கோஸ்ட் கேப்டன் பிராங்க் கெஸ்ஸி அடித்த கோலால் முன்னிலையை இழந்து தவித்தது.

எனினும், மாற்று வீரர்களிடம் இருந்து ஒரு சிறந்த ஆட்டத்தை எதிர்பார்த்து பயிற்சியாளர் ஜூலியன் நாகெல்ஸ்மேன் எடுத்த முடிவு நல்ல பலனைத் தந்தது. இரண்டாம் பாதியில் களம் புகுந்த உந்தாவ், இரண்டு கோல்களை அடித்து அசத்தினார்.

ஸ்டட்கார்ட் கிளப்பின் முன்கள ஆட்டக்காரரான உந்தாவ், ஆட்டத்தின் 68-வது நிமிடத்தில் சக மாற்று வீரரான நாடிம் அமிரி கொடுத்த கிராஸை நேர்த்தியாக கோலாக்கி ஐவரி கோஸ்ட்டின் பலத்த தடுப்பாட்டத்தை உடைத்தார். பின்னர், ஆட்டத்தின் 94-வது நிமிடத்தில் அவர் அடித்த கோல், ஐவரி கோஸ்ட் அணிக்கு பெரும் ஏமாற்றத்தை அளித்தது.

முன்னதாக, குராசோ அணிக்கு எதிரான தொடக்க ஆட்டத்தில் ஜெர்மனி 7-1 என்ற கணக்கில் வென்றபோதும், உந்தாவ் மாற்று வீரராக களம் இறங்கி ஒரு கோல் அடித்ததுடன் இரண்டு கோல்களுக்கு வழிவகுத்திருந்தார். இந்தத் தோல்வியால் சோர்வடைந்துள்ள ஐவரி கோஸ்ட் அணி, தங்களின் இறுதி ஆட்டத்தில் உலகக் கோப்பைக்கு முதன்முறையாக தகுதி பெற்றுள்ள குராசோ அணியை வென்றால், குரூப் E பிரிவில் ஜெர்மனிக்கு அடுத்தபடியாக அடுத்த சுற்றுக்கு முன்னேற இன்னும் வாய்ப்புள்ளது.

இப்போட்டியின் தொடக்கத்தில் எமர்ஸ் ஃபாயேவின் தலைமையிலான ஐவரி கோஸ்ட் அணி தங்களின் சுறுசுறுப்பான மற்றும் அதிரடி ஆட்டத்தால் அனைவரையும் கவர்ந்தது. இருப்பினும், ஜெர்மனி அணிக்கே கோல் அடிப்பதற்கான தெளிவான வாய்ப்புகள் கிடைத்தன. ஆட்டத்தின் 22-வது நிமிடத்தில், அலெக்சாண்டர் பாவ்லோவிச் தலையால் முட்டி பந்தை கோல் கம்பத்திற்குள் செலுத்தினார். ஆனால், ஐவரி கோஸ்ட் கோல்கீப்பர் யாஹியா ஃபோஃபானாவுக்கு எதிராக ஃபவுல் செய்ததாகக் கூறி அந்த கோல் நிராகரிக்கப்பட்டது.

அதன்பிறகு, ஐவரி கோஸ்ட் அணி ஆட்டத்தில் முன்னிலை பெற்றது. அந்த அணியின் 19 வயதான விங்கர் யான் தியோமண்டே கொடுத்த பந்தை அமாத் டயல்லோ கோல் போஸ்டை நோக்கி உதைத்தார். நாதனியல் பிரவுன் அதை தடுத்த போதிலும், மீண்டு வந்த பந்தை கெஸ்ஸி கோலாக மாற்றி அசத்தினார்.ஜெர்மனியின் ஏமாற்றம் மேலும் அதிகரித்தது. ஜமால் முசியாலா, இம்மானுவேல் அக்பாடூவுக்கு எதிராக ஃபவுல் செய்ததால், காய் ஹாபர்ட்ஸ் அடித்த கோல் நடுவரால் மறுக்கப்பட்டது.

அதே நேரத்தில், ஐவரி கோஸ்ட் அணியின் கிறிஸ்ட் இனாவ் ஓலாய் மற்றும் கெஸ்ஸி ஆகியோருக்கு கிடைத்த கோல் வாய்ப்புகள் நழுவியதால் அவர்களால் முன்னிலையை இரட்டிப்பாக்க முடியவில்லை. இந்த தவறுகளே இறுதியில் அவர்களுக்குப் பெரும் பாதிப்பாக அமைந்தது. ஆட்டத்தின் இறுதிப் பகுதியில் பிரவுன் மற்றும் அமிரி ஆகியோரின் கோல் முயற்சிகளை ஃபோஃபானா தடுத்தார். ஆனால், ஆட்டத்தின் கடைசி வினாடிகளில் பெலிக்ஸ் நமேச்சா கொடுத்த பந்தை அசாத்தியமாகக் கட்டுப்படுத்தி, திசை மாறி கோல்கீப்பரைக் கடந்து உந்தாவ் அடித்த கோலைத் தடுக்க அவரால் முடியாமல் போனது. இந்த கோல் ஐவரி கோஸ்ட் ரசிகர்களின் கனவுகளை சுக்குநூறாக்கியது.