FIFA WC: கருவிலே உயிரிழந்த ஆண் குழந்தை.. கோல் அடித்து கண்ணீர் விட்டு அழுத நெதர்லாந்து வீரர்
FIFA WC: கருவிலே உயிரிழந்த ஆண் குழந்தை.. கோல் அடித்து கண்ணீர் விட்டு அழுத நெதர்லாந்து வீரர்
கான்சாஸ்: ஃபிஃபா உலகக் கோப்பை தொடரின் நெதர்லாந்து அணியின் நட்சத்திர முன்கள வீரரும் லிவர்பூல் கிளப்பின் ஸ்டார் வீரருமான கோடி கக்போ (Cody Gakpo), கோல் அடித்த பிறகு மைதானத்திலேயே கண்ணீர் விட்டு அழுதார். அவரது மனைவி நோவா வான் டெர் பிஜ்க்கு (Noa van der Bij) ஏற்பட்ட கருச்சிதைவு காரணமாக, பிறக்காத தங்களது ஆண் குழந்தை உயிரிழந்த சில மணிநேரங்களிலேயே இச்சம்பவம் நிகழ்ந்துள்ளது.
கோடி கக்போவின் துணைவியான நோவா வான் டெர் பிஜ், இந்த சோகமான செய்தியை சமூக ஊடகங்களில் பகிர்ந்து கொண்டார். இதையடுத்து, கன்சாஸ் சிட்டிக்கு அருகிலுள்ள நெதர்லாந்து உலகக் கோப்பை முகாம் பகுதியில் தங்கியிருக்கும் தனது குடும்பத்தினருடன் இருக்க கக்போவிற்கு நெதர்லாந்து அணியின் நிர்வாகம் விடுப்பு வழங்கியது.
இந்த நெஞ்சை உலுக்கும் சோக செய்திக்கு பிறகு, கக்போ தேசிய அணிக்கான கடமையிலிருந்து தற்காலிகமாக விலகுவார் என்றே பலரும் எதிர்பார்த்தனர். இருப்பினும், அவர் விளையாட முடிவு செய்தார். மொராக்கோ அணிக்கு எதிரான இந்த முக்கியமான ஆட்டத்தில், நெதர்லாந்து பயிற்சியாளர் ரொனால்ட் கோமனின் (Ronald Koeman) தொடக்க லெவன் (XI) அணியில் கோடி கக்போ சேர்க்கப்பட்டார். ஆட்டத்தின் முதல் பாதியில் அமைதியாக விளையாடிய கக்போ, இரண்டாவது பாதியில் அதிரடியாக விளையாடி நெதர்லாந்து அணிக்கான முதல் கோலை அடித்தார்.
ஆனால், கக்போ அடித்த இந்த முதல் கோல் அவரது அணிக்கு வெற்றியைத் தேடித்தரவில்லை. திங்கள்கிழமை நடைபெற்ற இப்போட்டியின் பெனால்டி ஷூட்-அவுட் முறையில் மொராக்கோ அணி நெதர்லாந்தை வீழ்த்தி, ஃபிஃபா உலகக் கோப்பையின் அடுத்த சுற்றுக்கு (Last 16) தகுதி பெற்றது.கூடுதல் நேர முடிவில் இரு அணிகளும் 1-1 என்ற கணக்கில் சமநிலை பெற்றதை அடுத்து, பெனால்டி ஷூட்-அவுட்டில் மொராக்கோ அணி 3-2 என்ற கணக்கில் நெதர்லாந்தை வீழ்த்தியது. மொராக்கோ அணியின் நட்சத்திர மிட்ஃபீல்டர் இஸ்மாயில் சைபாரி (Ismael Saibari) அணியின் வெற்றிக்கான இறுதி பெனால்டி கிக்கை சரியாக அடித்து இலக்கை எட்டினார்.
பெனால்டி ஷூட்-அவுட்டின் போது, நெதர்லாந்தின் கிரிசென்சியோ சம்மர்வில்லின் (Crysencio Summerville) பெனால்டி முயற்சியை மொராக்கோ கோல்கீப்பர் யாசின் பூனு (Yassine Bounou) மிகச்சிறப்பாகத் தடுத்தார். அதைத் தொடர்ந்து சைபாரி கோல் அடித்து மொராக்கோவின் வெற்றியை உறுதி செய்தார். இந்த வெற்றியின் மூலம், மொராக்கோ அணி ஹூஸ்டனில் சனிக்கிழமை, ஜூன் 4 அன்று நடைபெறவுள்ள 16-வது சுற்று ஆட்டத்தில் கனடாவை எதிர்கொள்ளவுள்ளது.