இந்தியா, பாகிஸ்தான் கூட இல்ல.. ஆஸ்திரேலிய மண்ணில் வங்கதேசம் படைத்த மாபெரும் சாதனை

இந்தியா, பாகிஸ்தான் கூட இல்ல.. ஆஸ்திரேலிய மண்ணில் வங்கதேசம் படைத்த மாபெரும் சாதனை

டார்வின்: ஆஸ்திரேலிய மண்ணில் டெஸ்ட் போட்டியை வென்ற மூன்றாவது ஆசிய அணி என்ற வரலாற்று சாதனையை வங்கதேசம் படைத்துள்ளது. டார்வினில் உள்ள மர்ராரா கிரிக்கெட் மைதானத்தில் நடைபெற்ற இரு போட்டிகள் கொண்ட தொடரின் முதல் டெஸ்ட் போட்டியில், நஜ்முல் ஹொசைன் சாண்டோ தலைமையிலான வங்கதேச அணி ஆஸ்திரேலியாவை ஒன்பது விக்கெட் வித்தியாசத்தில் வீழ்த்தி 1-0 என முன்னிலை பெற்றுள்ளது.

முதல் இன்னிங்ஸில் 228 ரன்கள் என்ற வலுவான முன்னிலையைப் பெற்ற வங்கதேசம், ஆஸ்திரேலியாவை இரண்டாவது இன்னிங்ஸில் 284 ரன்களுக்குச் சுருட்டியது. இதன் மூலம் வங்கதேசத்திற்கு 57 ரன்கள் என்ற மிக எளிய இலக்கு நிர்ணயிக்கப்பட்டது.

முதல் இன்னிங்ஸில் சதம் விளாசிய தன்சித் ஹசன் தமீம் இரண்டாவது இன்னிங்ஸில் ரன் ஏதும் எடுக்காமல் ஆட்டமிழந்த போதிலும், வங்கதேச அணி வெறும் 14.2 ஓவர்களில் ஒரு விக்கெட்டை மட்டும் இழந்து இலக்கை எளிதாக எட்டியது.

இந்த வரலாற்றுச் சிறப்புமிக்க வெற்றியின் மூலம், கடந்த 30 ஆண்டுகளில் ஆஸ்திரேலியாவில் டெஸ்ட் போட்டியை வென்ற இந்தியாவுக்கு அடுத்த இரண்டாவது ஆசிய அணி என்ற பெருமையை வங்கதேசம் பெற்றுள்ளது. ஆஸ்திரேலியாவில் பாகிஸ்தானின் கடைசி டெஸ்ட் வெற்றி நவம்பர்-டிசம்பர் 1995 இல் கிடைத்தது என்பது குறிப்பிடத்தக்கது.

ஆஸ்திரேலிய மண்ணில் பாகிஸ்தான் தனது முதல் டெஸ்ட் வெற்றியைப் பதிவு செய்ய 7-வது முறை வரை காத்திருக்க வேண்டியிருந்தது. இந்தியா தனது முதல் வெற்றியைப் பெற 12 டெஸ்ட் போட்டிகள் விளையாட வேண்டியிருந்தது. ஆனால், வங்கதேச அணியோ தனது 3-வது டெஸ்ட் போட்டியிலேயே ஆஸ்திரேலியாவில் முதல் வெற்றியைப் பெற்று சாதனை படைத்துள்ளது.

ஆஸ்திரேலிய மண்ணில் ஆஸ்திரேலியாவை வீழ்த்தி தனது முதல் டெஸ்ட் வெற்றியைப் பெற வங்கதேசத்தை விடக் குறைவான போட்டிகளை எடுத்துக்கொண்ட ஒரே அணி இங்கிலாந்து மட்டுமே ஆகும். இங்கிலாந்து தங்களது 2வது டெஸ்டில் ஆஸ்திரேலியாவை வீழ்த்தியது. வங்கதேசம், தென்னாப்பிரிக்கா ஆகிய அணிகள் 3வது டெஸ்டில் ஆஸ்திரேலிய மண்ணில் வென்றது. வெஸ்ட் இண்டீஸ் 5வது முறையும், பாகிஸ்தான் மற்றும் நியூசிலாந்து தங்களது 7வது டெஸ்டிலும் ஆஸ்திரேலிய மண்ணில் வென்றது. இந்தியா 12வது முறை தான் முதல் டெஸ்டில் வென்றது. இலங்கை, ஜிம்பாப்வே அணிகள் இன்னும் முதல் வெற்றியை ஆஸ்திரேலிய மண்ணில் வெற்றி பெறவில்லை.