இந்தியா

இந்தியா - பாகிஸ்தான் தங்கப் பதக்க போட்டி.. பிளேயிங் 11-ல் முக்கிய முடிவு எடுத்த ஸ்ரேயாஸ் ஐயர்

நிஷின்: 2026 ஆசிய விளையாட்டுப் போட்டி ஆண்கள் கிரிக்கெட்டின் தங்கப் பதக்க இறுதிப்போட்டியில், இந்திய அணி டாஸ் வென்று முதலில் பேட்டிங் செய்ய முடிவு செய்தது. இந்த இறுதிப்போட்டிக்கான இந்திய அணியின் பிளேயிங் லெவனில் எந்த மாற்றமும் செய்யாமல் அதே வெற்றி கூட்டணியுடன் களமிறங்க கேப்டன் ஸ்ரேயாஸ் ஐயர் முக்கிய முடிவு எடுத்துள்ளார்.

ஜப்பானின் நிஷின் நகரில் உள்ள கோரோகி ஸ்போர்ட்ஸ் பார்க் மைதானத்தில் இன்று நடைபெறும் இந்த போட்டியில், டாஸ் வென்ற இந்திய கேப்டன் ஸ்ரேயாஸ் ஐயர் தயக்கமின்றி முதலில் பேட்டிங்கை தேர்வு செய்தார். ஆடுகளம் சுழற்பந்து வீச்சுக்கு சாதகமாக இருக்கும் என்பதால், முதலில் ஒரு நல்ல ஸ்கோரை குவித்து பின்னர் எதிரணியை சுழலில் வீழ்த்தும் திட்டத்துடன் இந்தியா களமிறங்கியுள்ளது.

டாஸ் நிகழ்வின் போது இந்தியா - பாகிஸ்தான் கேப்டன்கள் இருவரும் கைகுலுக்கிக் கொள்வதைத் தவிர்த்தது நேரலை காட்சிகளில் தெளிவாகத் தெரிந்தது. அரையிறுதிப் போட்டியில் இலங்கையை 45 ரன்களுக்கு சுருட்டி 124 ரன்கள் வித்தியாசத்தில் இமாலய வெற்றி பெற்ற அதே பலம் வாய்ந்த பிளேயிங் லெவனுடன் இந்திய அணி களமிறங்குகிறது. பாகிஸ்தான் அணியும் தனது அரையிறுதி அணியில் எந்த மாற்றமும் செய்யாமல் அதே வீரர்களுடன் விளையாடுகிறது.

இந்திய அணியின் தொடக்க வீரர்களாக 15 வயதான வைபவ் சூர்யவன்ஷி மற்றும் அதிரடி வீரர் அபிஷேக் சர்மா ஆகியோர் களமிறங்குகின்றனர். மிடில் ஆர்டரில் சஞ்சு சாம்சன், கேப்டன் ஸ்ரேயாஸ் ஐயர், அரையிறுதியில் 80 ரன்கள் விளாசிய இஷான் கிஷன், திலக் வர்மா, சிவம் துபே என பேட்டிங் பட்டாளம் உள்ளது.

பந்துவீச்சில் ஜஸ்பிரித் பும்ராவுடன் அக்சர் படேல், வாஷிங்டன் சுந்தர் மற்றும் ரவி பிஷ்னோய் ஆகியோர் சுழலில் மிரட்ட தயாராக உள்ளனர்.

இந்திய அணி: வைபவ் சூர்யவன்ஷி, அபிஷேக் சர்மா, சஞ்சு சாம்சன், ஸ்ரேயாஸ் ஐயர் (கேப்டன்), இஷான் கிஷன், திலக் வர்மா, ஷிவம் துபே, அக்சர் படேல், வாஷிங்டன் சுந்தர், ரவி பிஷ்னோய், ஜஸ்பிரித் பும்ரா.

பாகிஸ்தான் அணி: சாகிப்சாதா ஃபர்ஹான் (கேப்டன்), மாஸ் சதகத், உஸ்மான் கான், சைம் அயூப், ஹசன் நவாஸ், அப்துல் சமத், அராபத் மின்ஹாஸ், அகமது தானியல், முகமது வசீம் ஜூனியர், அப்ரார் அகமது, சுபியான் முகீம்.