📅 Wednesday, 18 November 2026 IST | கார்த்திகை 2, பராபவ வருடம்
Tamilzha Alt Logo Text சார்பற்ற நடுநிலைச் செய்திகள்
முக்கிய செய்திகள்
Sports May 27, 2026 04:00 PM

IPL 2026: கிரிக்கெட் வீரர்கள் குடும்பத்தினரை அநாகரிகமாக நடத்துவதா? நீங்க எல்லாம் மனுசங்களா?

IPL 2026: கிரிக்கெட் வீரர்கள் குடும்பத்தினரை அநாகரிகமாக நடத்துவதா? நீங்க எல்லாம் மனுசங்களா?

IPL 2026: கிரிக்கெட் வீரர்கள் குடும்பத்தினரை அநாகரிகமாக நடத்துவதா? நீங்க எல்லாம் மனுசங்களா?

மும்பை: கிரிக்கெட் வீரர்களின் குடும்ப உறுப்பினர்களை குறி வைத்து சமூக வலைத்தளங்களில் நடக்கும் இணையவழி வன்முறைகளை ஆகாஷ் சோப்ரா கடுமையாகக் கண்டித்துள்ளார். அண்மையில் ஆஸ்திரேலிய அணியின் டிராவிஸ் ஹெட் மனைவி மற்றும் இந்திய அணியின் ஷ்ரேயாஸ் ஐயரின் சகோதரி ஆகியோரை குறிவைத்து நிகழ்ந்த அருவருப்பான சம்பவங்களைத் தொடர்ந்து, இந்த கண்டனம் பெரும் பேசுபொருளாக மாறியுள்ளது.

சமூக வலைத்தளங்களில் கிரிக்கெட் வீரர்களின் குடும்பத்தினரைத் துஷ்பிரயோகம் செய்பவர்களை "தரங்கெட்டவர்கள்" என்று ஆகாஷ் சோப்ரா சாடியுள்ளார். தங்கள் விருப்பமான வீரர்களின் மீதான விமர்சனங்களைச் சகித்துக்கொள்ள முடியாத "ரசிகர்கள்" என்று சொல்லிக்கொள்பவர்கள் 'நயவஞ்சகர்கள்' என்றும் அவர் குற்றஞ்சாட்டினார்.

தான் எந்த பெயரையும் குறிப்பிடவில்லை என்றாலும், சோப்ரா தனது X பக்கத்தில் கடுமையாகப் பதிவிட்டிருந்தார். அந்தப் பதிவில், "மனைவிமார்... குழந்தைகள்... என்பவர்களை துஷ்பிரயோகம் செய்பவர்கள் மிகவும் தரங்கெட்டவர்கள். இது போன்றவர்கள் சில சமயங்களில் இந்தக் கருத்தின் கீழும் இருக்கலாம். அதே தரங்கெட்டவர்கள் தங்களைப் பற்றியோ தங்கள் விருப்பமானவர்கள் பற்றியோ ஒரு சிறு விமர்சனத்தையும் தாங்க மாட்டார்கள். நயவஞ்சகர்கள்," என்று அவர் குறிப்பிட்டிருந்தார்.

இந்த சர்ச்சைகள், ராயல் சேலஞ்சர்ஸ் பெங்களூரு மற்றும் சன்ரைசர்ஸ் ஹைதராபாத் அணிகளுக்கு இடையிலான ஐபிஎல் 2026 மோதலுக்குப் பிறகு எழுந்தன. அங்கு விராட் கோலிக்கும் டிராவிஸ் ஹெட்டுக்கும் இடையே களத்தில் ஒரு கைகலப்பு ஏற்பட்டது. போட்டி முடிந்த பிறகு வழக்கம் போல கைகுலுக்கும் சம்பிரதாயத்தின்போது கோலி, ஹெட் உடன் கைகுலுக்க மறுத்தது சமூக வலைத்தளங்களில் பெரும் பேசுபொருளானது.

இந்த சம்பவத்தைத் தொடர்ந்து, ஹெட் மனைவி ஜெசிகாவுக்கு இணையத்தில் துஷ்பிரயோக செய்திகள் குவிந்ததாக அவர் வெளிப்படுத்தினார். ஆஸ்திரேலிய ஊடகமான 'தி அட்வர்டைசர்' செய்தி நிறுவனத்திடம் ஜெசிகா பேசுகையில், "இது உலகக் கோப்பைக்குப் பிறகு நடந்த துஷ்பிரயோகத்தின் மறுபக்கம் போல் உணர்கிறேன். என் சமூக வலைத்தளங்கள் முழுவதும் தாக்குதல்களால் நிரம்பி வழிந்தன. நாங்கள் நலமாக இருக்கிறோம், ஆனால் அவர்கள் என் நண்பர்களையும் குடும்பத்தினரையும் தாக்குகிறார்கள்," என்று கூறினார்.

தொடர்ந்து பேசிய ஜெசிகா, "எல்லா விளையாட்டுகளிலும் மனநலம், கண்ணோட்டம் மற்றும் ஒருவருக்கொருவர் பேசும் விதம் குறித்து முக்கிய உரையாடல் நடக்கிறது. உணர்ச்சி எப்போதும் விளையாட்டின் ஒரு பகுதியாகும், ஆனால் விளையாட்டிற்குப் பின்னால் உண்மையான மனிதர்களும், குடும்பங்களும் இருக்கிறார்கள் என்பதை நினைவில் கொள்ள வேண்டும். இது ஒருவருக்கொருவர் அதிக அன்பையும் ஆதரவையும் ஊக்குவிக்கும் என்று நம்புகிறேன்," என நம்பிக்கை தெரிவித்தார்.

மறுபுறம், ஸ்ரேயாஸ் ஐயரின் சகோதரி ஷ்ரேஸ்தாவும் இணையவழி துன்புறுத்தலை எதிர்கொண்டார். பஞ்சாப் கிங்ஸ் மற்றும் கொல்கத்தா நைட் ரைடர்ஸ் அணிகளுக்கு இடையேயான ஐபிஎல் 2026 போட்டி மழையால் கைவிடப்பட்டதைப் பற்றிய சமூக வலைத்தளப் பதிவுக்குப் பிறகு அவர் அதிகமான வசவுகளைப் பெற்றார்.

"அந்த காணொலியின் நோக்கம் ஒரு வேடிக்கையான கேலி மட்டுமே. நான் யாரையும் கேலி செய்யவில்லை. கேலிக்குப் பின்னால் எனக்கு எந்த கெட்ட எண்ணமும் இல்லை. நான் யாருக்கும் எதிராக வெறுப்பை பரப்பவில்லை," என்று ஷ்ரேஸ்தா கூறினார்.

மேலும், "என் பணிபுரியும் இடத்திற்கு நீங்கள் அழைத்து, என்னையும், என் சக ஊழியர்களையும், என் மாணவர்களையும், என் குடும்பத்தையும் துஷ்பிரயோகம் செய்கிறீர்கள்," என்றும் ஷ்ரேஸ்தா தனது அனுபவத்தைப் பகிர்ந்து கொண்டார். இந்த சம்பவங்கள் கிரிக்கெட்டைப் பின்தொடர்பவர்கள் மத்தியில் அதிகரித்து வரும் இணையவழி துஷ்பிரயோகம் பற்றிய கவலைகளை மீண்டும் ஒருமுறை வெளிப்படுத்தியுள்ளன.