📅 Wednesday, 18 November 2026 IST | கார்த்திகை 2, பராபவ வருடம்
Tamilzha Alt Logo Text சார்பற்ற நடுநிலைச் செய்திகள்
முக்கிய செய்திகள்
Cinema May 27, 2026 06:31 PM

நீங்க ஆவலுடன் காத்திருந்த அந்த தருணம்...‘லீடர்’ ஓடிடி ரிலீஸ் தேதி அறிவிப்பு…!

நீங்க ஆவலுடன் காத்திருந்த அந்த தருணம்...‘லீடர்’ ஓடிடி ரிலீஸ் தேதி அறிவிப்பு…!

சென்னை : தொழிலதிபராக இருந்து நடிகராக மாறிய லெஜண்ட் சரவணன் நடித்த “லீடர்” திரைப்படம் தற்போது ஓடிடி வெளியீட்டுக்கு தயாராகியுள்ளது. ஆர்.எஸ்.துரை செந்தில்குமார் இயக்கத்தில் உருவான இந்த உளவு அதிரடி திரைப்படம் கடந்த ஏப்ரல் 3ஆம் தேதி திரையரங்குகளில் வெளியானது.

லெஜண்ட் சரவணன் தயாரித்து நடித்துள்ள இந்தப் படத்தில் ஆண்ட்ரியா ஜெரெமையா, ஷாம், பயல் ராஜ்புத் உள்ளிட்டோர் முக்கிய கதாபாத்திரங்களில் நடித்திருந்தனர். திரையரங்குகளில் வெளியான போது கலவையான விமர்சனங்களை பெற்றாலும், ரசிகர்களிடையே நல்ல வரவேற்பையும் பெற்றது.

இந்த நிலையில், “லீடர்” திரைப்படத்தின் ஓடிடி வெளியீட்டு தேதி தற்போது அதிகாரப்பூர்வமாக அறிவிக்கப்பட்டுள்ளது. வரும் மே 29ஆம் தேதி முதல் அமேசான் பிரைம் ஓடிடி தளத்தில் படம் வெளியாகிறது. தமிழ் மட்டுமல்லாமல் தெலுங்கு, கன்னடம் மற்றும் மலையாள மொழிகளிலும் படம் வெளியாக உள்ளது.

படத்தின் கதை, தூத்துக்குடியை மையமாகக் கொண்டு நகர்கிறது. துறைமுகத்தை குறிவைத்து நடைபெறவுள்ள பெரிய தாக்குதலை தடுக்க ரகசிய வேடத்தில் செயல்படும் உளவு அதிகாரியாக லெஜண்ட் சரவணன் நடித்துள்ளார். மெக்கானிக் வேடத்தில் மறைந்து செயல்படும் அவர், ஆபத்தான கும்பலின் திட்டங்களை கண்டுபிடித்து தன் குடும்பத்தையும் காப்பாற்ற போராடுகிறார்.

அதிரடி, சஸ்பென்ஸ் மற்றும் உளவு பின்னணியில் உருவான இந்தப் படத்தில் ஆண்ட்ரியா, ஷாம் உள்ளிட்ட நடிகர்களின் நடிப்பும் கதைக்கு வலு சேர்த்ததாக ரசிகர்கள் கருத்து தெரிவித்திருந்தனர். திரையரங்குகளில் பார்க்க தவறவிட்ட ரசிகர்கள், தற்போது வீட்டிலிருந்தபடியே ஓடிடியில் “லீடர்” திரைப்படத்தை பார்க்க தயாராக இருக்கிறார்கள்.

“லீடர்” திரைப்படத்தின் ஓடிடி உரிமை எத்தனை கோடிக்கு விற்கப்பட்டது என்பது குறித்து அதிகாரப்பூர்வ அறிவிப்பு வெளியாகவில்லை. இருப்பினும், படம் அமேசான் பிரைம் ஓடிடி தளத்திற்கு விற்கப்பட்டிருப்பது உறுதியாகியுள்ளது. சினிமா வட்டார தகவல்களின் படி, ஓடிடி மற்றும் சாட்டிலைட் உரிமைகள் சேர்த்து சுமார் ₹15 முதல் ₹20 கோடி வரை ஒப்பந்தம் நடைபெற்றிருக்கலாம் என கூறப்படுகிறது.