நியூசிலாந்துக்கு எதிரான 3

நியூசிலாந்துக்கு எதிரான 3-வது டெஸ்ட்: இங்கிலாந்து அணியில் 4 அதிரடி மாற்றம் - பென் ஸ்டோக்ஸ் மாஸ் கம்பேக்!

நாட்டிங்காம்: நியூசிலாந்துக்கு எதிரான மூன்றாவது டெஸ்ட் போட்டிக்கான தனது 11 பேர் கொண்ட அணியை இங்கிலாந்து அறிவித்துள்ளது. ஓவல் மைதானத்தில் நடைபெற்ற இரண்டாவது டெஸ்டில் அடைந்த கடுமையான தோல்வியைத் தொடர்ந்து, இங்கிலாந்து அணி நிர்வாகம் தனது அணியில் நான்கு முக்கிய மாற்றங்களைச் செய்து செய்துள்ளது. அதன்படி, கேப்டன் பென் ஸ்டோக்ஸ், கஸ் அட்கின்சன், ஜேமி ஸ்மித் மற்றும் சோயிப் பஷீர் ஆகியோர் மீண்டும் அணிக்குத் திரும்பியுள்ளனர்.

லண்டனில் உள்ள செல்சியா இரவு விடுதியில் நடந்த சம்பவத்தில் தொடர்பு இருப்பதாகக் கூறி, ஆல்-ரவுண்டர் பென் ஸ்டோக்ஸ் மற்றும் வேகப்பந்து வீச்சாளர் கஸ் அட்கின்சன் ஆகியோருக்கு ஒரு போட்டித் தடையும், எழுத்துப்பூர்வ எச்சரிக்கையும் வழங்கப்பட்டிருந்தது. தற்போது, கிரிக்கெட் ஒழுங்குமுறை அமைப்பின் (Cricket Regulator) முழுமையான விசாரணைக்குப் பிறகு அவர்கள் மீதான குற்றச்சாட்டுகள் நீக்கப்பட்டு, மீண்டும் அணியில் சேர்க்கப்பட்டுள்ளனர்.

இவர்கள் இல்லாத நிலையில், ஜோ ரூட் தலைமையில் களம் கண்ட இங்கிலாந்து அணி, இரண்டாவது டெஸ்ட் போட்டியில் 253 ரன்கள் வித்தியாசத்தில் நியூசிலாந்திடம் படுதோல்வி அடைந்தது. இதன் காரணமாக மூன்று போட்டிகள் கொண்ட இந்த டெஸ்ட் தொடர் தற்போது 1-1 என்ற கணக்கில் சமநிலையில் உள்ளது. இதையடுத்து, தொடரை வெல்லும் முனைப்பில் இங்கிலாந்து அணி தீவிரமாக உள்ளது.

முன்னதாக, இங்கிலாந்து கிரிக்கெட் வாரியத்தின் (ECB) நெறிமுறை அழுத்தங்கள் காரணமாக பென் ஸ்டோக்ஸ் தனது கேப்டன் பதவியில் இருந்து விலகவும், சர்வதேச கிரிக்கெட்டிலிருந்து ஓய்வு பெறவும் பரிசீலித்து வருவதாக தகவல்கள் வெளியாகின. அந்த இடைவெளியில் கவுண்டி கிரிக்கெட்டில் டர்ஹாம் அணிக்காக விளையாடிய அவர், 95 ரன்கள் குவித்து தனது ஃபார்மை நிரூபித்தார். தற்போது அவர் மீண்டும் கேப்டனாக இங்கிலாந்து அணியை வழிநடத்த உள்ளார்.

ஸ்டோக்ஸ் இல்லாத சூழலில் பேட்டிங் வரிசையை வலுப்படுத்துவதற்காக, பேட்டிங் திறன் குறைவாகக் கொண்ட சுழற்பந்து வீச்சாளர் சோயிப் பஷீர் கடந்த போட்டியில் நீக்கப்பட்டிருந்தார். ஆனால், ஓவல் மைதானத்தின் ஆடுகளம் சுழற்பந்து வீச்சுக்கு சாதகமாக இருந்ததை நியூசிலாந்து அணி சிறப்பாகப் பயன்படுத்தி வெற்றி பெற்றது. இதனால், இந்த முறை பஷீர் மீண்டும் அணியில் சேர்க்கப்பட்டுள்ளார். அதே நேரத்தில், காயம் காரணமாக வேகப்பந்து வீச்சாளர் ஆலி ராபின்சன் தொடர்ந்து அணியில் இடம்பெறவில்லை.

மேலும், தனது இரண்டாவது குழந்தையின் பிறப்புக்காக இரண்டாவது டெஸ்ட் போட்டியில் இருந்து விலகியிருந்த விக்கெட் கீப்பர் ஜேமி ஸ்மித் மீண்டும் அணிக்குத் திரும்பியுள்ளார். இந்த நான்கு வீரர்களின் வருகையால், கடந்த போட்டியில் அறிமுக வீரர்களாக களம் கண்ட ஜோர்டான் காக்ஸ், தாமஸ் ரீவ், சன்னி பேக்கர் மற்றும் மேத்யூ ஆகியோர் அணியில் இருந்து நீக்கப்பட்டுள்ளனர். தொடரை தீர்மானிக்கும் கடைசி டெஸ்ட் வியாழன் ஜூன் 25ஆம் தேதி தொடங்குகிறது.

மூன்றாவது டெஸ்ட் போட்டிக்கான இங்கிலாந்து அணி (Playing XI)

மூன்றாவது டெஸ்ட் போட்டிக்கான இங்கிலாந்து அணியில் பென் டக்கெட் (Ben Duckett) மற்றும் எமிலியோ கே (Emilio Gay) தொடக்க ஆட்டக்காரர்களாக களம் இறங்குகின்றனர். இவர்களுடன் ஜேக்கப் பெத்தேல் (Jacob Bethell), ஜோ ரூட் (Joe Root), ஹாரி புரூக் (Harry Brook) ஆகியோர் பேட்ஸ்மேன்களாகவும், ஜேமி ஸ்மித் (Jamie Smith) விக்கெட் கீப்பராகவும் செயல்பட உள்ளனர். கேப்டன் பென் ஸ்டோக்ஸ் (Ben Stokes) ஆல்-ரவுண்டராக அணியை வழிநடத்த, கஸ் அட்கின்சன் (Gus Atkinson), ஜோஃப்ரா ஆர்ச்சர் (Jofra Archer) மற்றும் ஜோஷ் டங் (Josh Tongue) ஆகியோர் வேகப்பந்து வீச்சாளர்களாகவும், சோயிப் பஷீர் (Shoaib Bashir) சுழற்பந்து வீச்சாளராகவும் இடம்பெற்றுள்ளனர்.