“பாகிஸ்தானுக்கு வாசிம் அக்ரம் உலகக்கோப்பையை வென்று கொடுத்ததை போல நானும்..” காகிசோ ரபாடா ஆசை

“பாகிஸ்தானுக்கு வாசிம் அக்ரம் உலகக்கோப்பையை வென்று கொடுத்ததை போல நானும்..” காகிசோ ரபாடா ஆசை

ஜோகன்னஸ்பர்க்: கடந்த 1992 ஆம் ஆண்டு இம்ரான் கான் தலைமையிலான பாகிஸ்தான் அணியில் வாசிம் அக்ரம் ஆல்-ரவுண்ட் ஆட்டத்தை வெளிப்படுத்தி உலகக்கோப்பையை வென்ற தருணத்தை மறக்கவே முடியாது என்றும், அதுபோல 2027 உலகக்கோப்பையை தென் ஆப்பிரிக்காவுக்கு வென்று தர விரும்புகிறேன் என்றும் காகிசோ ரபாடா தெரிவித்துள்ளார்.

தென் ஆப்பிரிக்கா, ஜிம்பாப்வே மற்றும் நமீபியா ஆகிய நாடுகள் இணைந்து 2027 ஆம் ஆண்டு ஒருநாள் உலகக்கோப்பை கிரிக்கெட் தொடரை நடத்த உள்ளன. சொந்த மண்ணில் உலகக்கோப்பை நடக்க உள்ளதால் தென் ஆப்பிரிக்க அணிக்கு கூடுதல் அழுத்தம் இருக்கும் என எதிர்பார்க்கப்படுகிறது.

இது குறித்து ஜோகன்னஸ்பர்க்கில் நடைபெற்ற 2027 உலகக்கோப்பை அறிமுக விழாவில் தென் ஆப்பிரிக்க வேகப்பந்து வீச்சாளர் காகிசோ ரபாடா பேசினார். அப்போது, "சொந்த மண்ணில் விளையாடுவதால் எங்களுக்கு எந்தவித கூடுதல் அழுத்தமும் இல்லை. மாறாக இது எங்களுக்கு ஒரு சுதந்திரமான உணர்வைத் தருகிறது. எங்கள் கோட்டையைப் பாதுகாக்க நாங்கள் தயாராக உள்ளோம்." என்றார்.

தனக்கு மிகவும் பிடித்த உலகக்கோப்பை தருணம் குறித்து பேசிய ரபாடா, "நான் ஒரு பந்துவீச்சாளர் என்பதால், பந்துவீச்சாளர்களின் கிளப்பைத் தான் தேர்ந்தெடுப்பேன். 1992 உலகக்கோப்பை இறுதிப்போட்டியில் இங்கிலாந்துக்கு எதிராக பாகிஸ்தானின் வாசிம் அக்ரம் வீசிய பந்துவீச்சை என்னால் மறக்கவே முடியாது. அப்போது இம்ரான் கான் தலைமையிலான பாகிஸ்தான் அணி கோப்பையை வென்றது. அந்த போட்டியில் அக்ரம் பேட்டிங்கில் 18 பந்துகளில் 33 ரன்கள் எடுத்ததோடு, பந்துவீச்சில் 49 ரன்கள் கொடுத்து 3 விக்கெட்டுகளையும் வீழ்த்தி ஆட்டநாயகன் விருது வென்றார்.

வாசிம் அக்ரமின் பந்துவீச்சு அசாத்தியமான திறமையுடனும், மிகுந்த வேகத்துடனும் இருந்தது. இறுதிப்போட்டியில் அவர் ஆட்டத்தின் போக்கையே மாற்றி பாகிஸ்தானுக்கு முதல் உலகக்கோப்பையை பெற்றுத் தந்தார். அதேபோல 2027 இல் தென் ஆப்பிரிக்க மண்ணில் நானும் எனது அணிக்கு ஒரு வரலாற்று வெற்றியைப் பெற்றுத் தர விரும்புகிறேன்" என்று ரபாடா கூறினார்.

தென் ஆப்பிரிக்க அணி சமீபகாலமாக அனைத்து வகையான கிரிக்கெட்டிலும் சிறப்பான ஆட்டத்தை வெளிப்படுத்தி வருகிறது. கடந்த 2025 ஆம் ஆண்டு லார்ட்ஸ் மைதானத்தில் நடைபெற்ற உலக டெஸ்ட் சாம்பியன்ஷிப் பட்டத்தை வென்றது. மேலும், 2026 டி20 உலகக்கோப்பையில் அரையிறுதி வரை முன்னேறியது.