Vaibhav sooryavanshi: இந்திய டி20 அணியில் முதல் முறையாக வாய்ப்பு.. அயர்லாந்து, இங்கி தொடரில் தேர்வு
Vaibhav sooryavanshi: இந்திய டி20 அணியில் முதல் முறையாக வாய்ப்பு.. அயர்லாந்து, இங்கி தொடரில் தேர்வு
மும்பை: இந்திய கிரிக்கெட்டின் இளைய நம்பிக்கை நட்சத்திரமாக உருவெடுத்துள்ள 15 வயது வைபவ் சூர்யவன்ஷி, முதன்முறையாக இந்திய டி20 அணியில் இடம் பிடித்துள்ளார். இதன் மூலம், சர்வதேச கிரிக்கெட் வரலாற்றில் இந்திய ஆண்கள் அணிக்காக அறிமுகமாகும் மிக இளைய வீரர் என்ற சாதனையைப் படைக்கும் வாய்ப்பு அவருக்கு உருவாகியுள்ளது.
சமீபத்தில் முடிவடைந்த ஐபிஎல் 2026 தொடரில் அவர் வெளிப்படுத்திய அதிரடியான ஆட்டம் தேர்வாளர்களின் கவனத்தை ஈர்த்ததைத் தொடர்ந்து, இந்த முக்கிய அழைப்பு விடுக்கப்பட்டுள்ளது.ஐபிஎல் 2026 சீசனில் ராஜஸ்தான் ராயல்ஸ் அணிக்காகத் துவக்க வீரராகக் களமிறங்கிய வைபவ், 16 ஆட்டங்களில் பங்கேற்று 776 ரன்களைக் குவித்து, தொடரில் அதிக ரன்கள் எடுத்த வீரராக முதலிடம் பிடித்தார்.
ஒட்டுமொத்தத் தொடரில் மொத்தம் 72 சிக்ஸர்களைப் பறக்கவிட்டு புதிய சாதனையைப் படைத்த அவர், ஆரஞ்சு டிராபி (Orange Cap), 'மோஸ்ட் வேலுயபிள் பிளேயர்' (MVP) விருது மற்றும் சிறந்த வளர்ந்து வரும் வீரர் ஆகிய பெருமைகளை வென்று உலகளவிலான கிரிக்கெட் ரசிகர்களின் கவனத்தை ஈர்த்தார்.
சர்வதேச கிரிக்கெட் அரங்கில் அவர் அறிமுகமாகும் பட்சத்தில், 1989-ம் ஆண்டு 16 வயது மற்றும் 205 நாட்களில் அறிமுகமான சச்சின் டெண்டுல்கரின் சாதனையை அவர் முறியடிப்பார். பீகாரைச் சேர்ந்த இந்த இடதுகை பேட்ஸ்மேன், அயர்லாந்தில் நடைபெறவுள்ள இரண்டு டி20 போட்டிகள் மற்றும் இங்கிலாந்தில் நடைபெறவுள்ள ஐந்து போட்டிகள் கொண்ட டி20 தொடருக்காகத் தயார் நிலையில் உள்ளார்.
ஐபிஎல் தொடருக்கு முன்னதாக, அண்டர்-19 உலகக் கோப்பை தொடரில் தொடர் நாயகன் விருதை வென்றதன் மூலம் தனது திறமையை வைபவ் ஏற்கனவே நிரூபித்துள்ளார். அவரது அசுர வேக வளர்ச்சியைக் கருத்தில் கொண்டு, ஜப்பானில் நடைபெறவுள்ள ஆசிய விளையாட்டுப் போட்டிகளுக்கான 30 பேர் கொண்ட உத்தேச அணியிலும் அவர் சேர்க்கப்பட்டுள்ளார். இது அவரது கிரிக்கெட் பயணத்தின் மிக முக்கியமான மைல்கல்லாகவும், வளர்ந்து வரும் வீரர்களுக்கு முன்னுதாரணமாகவும் பார்க்கப்படுகிறது.
அயர்லாந்து மற்றும் இங்கிலாந்து அணிகளுக்கு எதிரான டி20 தொடருக்கான இந்திய அணி அறிவிக்கப்பட்டுள்ளது. ஸ்ரேயாஸ் ஐயர் தலைமையிலான இந்த அணியில் வைபவ் சூர்யவன்ஷியுடன் அபிஷேக் சர்மா, சஞ்சு சாம்சன், இஷான் கிஷன், சிவம் துபே, திலக் வர்மா, நிதிஷ் குமார் ரெட்டி, அக்ஷர் படேல், வாஷிங்டன் சுந்தர், வருண் சக்ரவர்த்தி, ரவி பிஷ்னோய், ஹர்ஷித் ராணா, அர்ஷ்தீப் சிங் மற்றும் ஜஸ்பிரித் பும்ரா ஆகியோர் இடம்பெற்றுள்ளனர்.