வங்கதேச அணி 54 ரன்களுக்கு ஆல் அவுட்.. பயிற்சி ஆட்டத்தில் ஆஸ்திரேலிய வீரர் 8 விக்கெட் வீழ்த்தி அபாரம்

வங்கதேச அணி 54 ரன்களுக்கு ஆல் அவுட்.. பயிற்சி ஆட்டத்தில் ஆஸ்திரேலிய வீரர் 8 விக்கெட் வீழ்த்தி அபாரம்

டார்வின்: ஆஸ்திரேலியாவுக்கு எதிரான வரலாற்று முக்கியத்துவம் வாய்ந்த டெஸ்ட் தொடருக்கு முன்னதாக, வங்கதேச பேட்டர்கள் இரண்டாவது இன்னிங்ஸில் 54 ரன்களில் ஆல் அவுட் ஆனது அந்நாட்டு ரசிகர்களை அதிர்ச்சியில் ஆழ்த்தியுள்ளது. டார்வினில் உள்ள பயிற்சி ஆட்டத்தின் இரண்டாவது இன்னிங்ஸில், கிரிக்கெட் ஆஸ்திரேலியா லெவன் அணிக்காக விளையாடிய 22 வயதான, சர்வதேச போட்டிகளில் விளையாடாத இளம் வேகப்பந்து வீச்சாளர் கேம்ப்பெல் தாம்சன் அபாரமாக பந்துவீசினார்.

அவர் வெறும் 11 ஓவர்களில் 25 ரன்கள் மட்டுமே விட்டுக்கொடுத்து 8 விக்கெட்டுகளை வீழ்த்தி அசத்தினார். இதனால் வங்கதேச அணி இரண்டாவது இன்னிங்ஸில் வெறும் 54 ரன்களுக்கு ஆல்-அவுட் ஆனது.தெற்கு ஆஸ்திரேலிய அணிக்காக இதுவரை ஒரே ஒரு முதல் தர போட்டியில் மட்டுமே விளையாடியுள்ள இந்த இடதுகை வேகப்பந்து வீச்சாளர், வங்கதேச அணியின் முதல் ஐந்து பேட்டர்களையும் அடுத்தடுத்து ஆட்டமிழக்கச் செய்தார்.

பின்னர், வங்கதேச அணியின் கேப்டன் நஜ்முல் ஹொசைன் சாண்டோ, தஸ்கின் அகமது மற்றும் எபடோட் ஹொசைன் ஆகியோரின் விக்கெட்டுகளையும் வீழ்த்தி 8 விக்கெட் சாதனையை நிறைவு செய்தார்.பயிற்சி ஆட்டத்தின் முதல் இன்னிங்ஸில் 263 ரன்கள் எடுத்திருந்த வங்கதேச அணி, இரண்டாவது இன்னிங்ஸில் 22 ஓவர்களில் வெறும் 54 ரன்கள் மட்டுமே எடுத்து சுருண்டது.

தொடக்க ஆட்டக்காரர் தன்சித் ஹசன் தமீம் மட்டுமே அதிகபட்சமாக 41 பந்துகளில் 22 ரன்கள் எடுத்தார். அவரைத் தவிர மற்ற வீரர்கள் யாரும் இரட்டை இலக்க ரன்களைக் கூட எட்டவில்லை. பயிற்சி ஆட்டத்தின் இரண்டாவது இன்னிங்ஸில் வங்கதேச பேட்டர்களின் இந்த மோசமான ஆட்டம், ஆஸ்திரேலியாவுக்கு எதிரான வரவிருக்கும் வரலாற்றுச் சிறப்புமிக்க டெஸ்ட் தொடருக்கான அவர்களின் பயிற்சி குறித்து பெரும் கேள்விகளை எழுப்பியுள்ளது.

இந்தத் தொடரில் அவர்கள் மிட்செல் ஸ்டார்க், பாட் கம்மின்ஸ், ஜோஷ் ஹேசில்வுட் மற்றும் நாதன் லியான் போன்ற உலகத்தரம் வாய்ந்த பந்துவீச்சாளர்களை எதிர்கொள்ள வேண்டியுள்ளது. இந்த பயிற்சி ஆட்டத்தின் முதல் இன்னிங்ஸில், 28 வயதான சுழற்பந்து வீச்சாளர் கோரி ரோச்சிசியோலி 24 ஓவர்களில் 83 ரன்கள் கொடுத்து 6 விக்கெட்டுகளைக் கைப்பற்றி அசத்தினார். இரண்டாவது இன்னிங்ஸிலும் சிறப்பாக பந்துவீசிய அவர், 4 ஓவர்களில் 6 ரன்கள் மட்டுமே கொடுத்து 2 விக்கெட்டுகளை வீழ்த்தினார்.