கொல்கத்தா துர்கா பூஜை நெரிசல்: பலி எண்ணிக்கை 19 ஆக உயர்வு

புதுடெல்லி: கொல்கத்தாவின் துர்கா பூஜை பந்தலில் ஏற்பட்ட கூட்ட நெரிசலில் சிக்கி உயிரிழந்தவர்களின் எண்ணிக்கை 19 ஆக உயர்ந்துள்ளது. இதில் உயிரிழந்தோரின் குடும்பத்துக்கு மேற்கு வங்க மாநில அரசு ரூ.25 லட்சமும், மத்திய அரசு ரூ.2 லட்சமும் நிவாரணம் அளிக்க உத்தரவிடப்பட்டுள்ளது.

கொல்கத்தாவின் சோர்பகன் துர்கா பூஜை பந்தலில் நேற்று (அக்.17) பலத்த மழை காரணமாக கூட்ட நெரிசல் ஏற்பட்டது. பலத்த மழையின் போது மக்கள் கூட்டம் திடீரென முண்டியடித்த காரணத்தால் அங்கு நெரிசல் ஏற்பட்டது. இந்த நெரிசலில் சிக்கி உயிரிழந்தோரின் எண்ணிக்கை 19 ஆக உயர்ந்துள்ளது. 25-க்கும் மேற்பட்டோர் காயமடைந்தனர்.

சம்பவ இடத்துக்கு உடனடியாக விரைந்த கொல்கத்தா காவல்துறையினர், அந்த பகுதியின் சிசிடிவி காட்சிகளைப் சேகரித்து பெற்றனர். கூட்டத்தைக் கட்டுப்படுத்தும் பொறுப்பில் இருந்து, தங்கள் கடமையைச் சரியாகச் செய்யத் தவறியவர் மீது கடுமையான நடவடிக்கையும் துவங்கி உள்ளது.

இச்சம்பவத்தில் இதுவரை 12 பேரை தங்கள் காவலில் எடுத்துள்ள போலீஸார், அவர்களிடம் தீவிர விசாரணை மேற்கொண்டு வருகின்றனர். இவர்களில் பூஜை கமிட்டி உறுப்பினர்கள், தன்னார்வலர்கள், காவல்துறையினர், தற்காலிக ஊர்க்காவல் படையினர் மற்றும் தனியார் பாதுகாப்பு நிறுவனத்தைச் சேர்ந்தவர்கள் இடம் பெற்றுள்ளனர்.

சம்பவ இடத்துக்கு அம்மாநில முதல்வர் சுவேந்து அதிகாரியும் தனது உயர் அதிகாரிகளுடன் வந்து சேர்ந்தார். அங்கு கள சூழலை அறிந்த பின்னர் காயமடைந்தவர்கள் சிகிச்சை பெறும் மருத்துவமனைக்கு சென்றார். அங்கு நள்ளிரவு வரை இருந்தார். சம்பவம் மீது சிறப்பு புலனாய்வுக் குழு (எஸ்ஐடி) விசாரணை நடத்தப்படும் என முதல்வர் சுவேந்து அறிவித்துள்ளார்.

இது குறித்து முதல்வர் சுவேந்து, “இந்தச் சம்பவத்தில் அலட்சியமாகச் செயல்பட்டவர்கள் மீது கடுமையான நடவடிக்கை எடுக்கப்படும். குற்றவாளிகள் எவரும் தப்ப முடியாது. இதன் விசாரணையில் சிறப்பு அதிரடிப்படை, குற்றப் புலனாய்வுத் துறை மற்றும் பிற தொடர்புடைய அமைப்புகள் இடம்பெறும். உயிரிழந்தவர்களின் குடும்பத்துக்கு மாநில அரசு சார்பில் ரூ.25 லட்சம் நிதியுதவியும், அரசுப் பணியில் ‘குரூப்-டி’ நிலையிலான வேலையும் வழங்கும்” எனத் தெரிவித்துள்ளார்.

மத்திய அரசின் நிவாரணம்

முதல்வருடன் தலைமைச் செயலாளர், சுகாதாரத்துறை அமைச்சர், சட்டமன்ற உறுப்பினர், மாநகரக் காவல் ஆணையர், காவல்துறை தலைமை இயக்குநர், மாநில அமைச்சர் மற்றும் உள்ளூர் சட்டமன்ற உறுப்பினர் ஆகியோர் உடனிருந்தனர். பிரதமர் நரேந்திர மோடியும் கூட்ட நெரிசலில் பலியானவர்கள் குடும்பத்தினருக்கு மத்திய அரசின் சார்பில் ரூ.2 லட்சம் நிவாரணம் அறிவித்துள்ளார். காயம் அடைந்தவர்களுக்கு ரூ.50,000 அறிவிக்கப்பட்டுள்ளது.

நேரில் செல்லும் அமித் ஷா

மத்திய உள்துறை அமைச்சர் அமித் ஷா, இன்று (அக்.18) மேற்கு வங்க மாநிலத்தில் நடைபெறவிருந்த தனது நிகழ்ச்சிகளை ஒத்திவைத்துள்ளார். காயமடைந்தவர்களைச் சந்திப்பதற்காக அவர் இன்று மருத்துவமனைக்குச் செல்கிறார். இது குறித்து அமைச்சர் அமித் ஷா தனது எக்ஸ் தளப்பதிவில். “சோர்பகன் சர்வஜனீன் துர்கா பூஜை பந்தலில் ஏற்பட்ட நெரிசலில் பலர் பாதிக்கப்பட்டனர் என்பதை அறிந்து மிகுந்த மன வேதனை அடைந்தேன். இது தொடர்பாக முதல்வர் மற்றும் சுவேந்து அதிகாரியிடம் பேசினேன்” எனக் குறிப்பிட்டுள்ளார்.

மம்தா வேதனை

மேற்கு வங்க மாநிலத்தின் முன்னாள் முதல்வர் மம்தா பானர்ஜி, பூஜை பந்தலில் ஏற்பட்ட நெரிசல் போன்ற சூழல் குறித்து மிகுந்த அதிர்ச்சியடைந்ததாக தெரிவித்துள்ளார். “சர்பகான் பூஜா பந்தலில் ஏற்பட்ட நெரிசல் குறித்த செய்தியறிந்து நான் மிகுந்த அதிர்ச்சியும் வேதனையும் அடைந்தேன். காயமடைந்த அனைவரும் விரைவில் குணமடையவும், இந்த இக்கட்டான சூழலில் அவர்களின் குடும்பத்தினருக்குத் தேவையான மன வலிமையும் தைரியமும் கிடைக்கட்டும் என்று அன்னை துர்கையிடம் வேண்டிக்கொள்கிறேன்” என அவர் கூறியுள்ளார்.