வைபவ் சூர்யவன்ஷிக்கு இடம் அளிக்க மறுப்பு.. 3

வைபவ் சூர்யவன்ஷிக்கு இடம் அளிக்க மறுப்பு.. 3-வது டி20 போட்டியில் ட்விஸ்ட் வைத்த கம்பீர் - ஸ்ரேயாஸ்

டெல்லி: ஆப்கானிஸ்தான் அணிக்கு எதிரான 3-வது மற்றும் கடைசி டி20 போட்டியில், பெரிதும் எதிர்பார்க்கப்பட்ட 15 வயது இளம் வீரர் வைபவ் சூர்யவன்ஷிக்கு பிளேயிங் லெவனில் இடம் மறுக்கப்பட்டுள்ளது. டெல்லி அருண் ஜெட்லி மைதானத்தில் நடைபெறும் இந்த ஆட்டத்தில் டாஸ் வென்ற ஆப்கானிஸ்தான் அணி முதலில் பந்துவீச்சை தேர்வு செய்தது.

இந்திய அணி ஏற்கனவே முதல் 2 போட்டிகளில் வென்று தொடரை 2-0 எனக் கைப்பற்றிவிட்டதால், இன்றைய ஆட்டத்தில் பெஞ்சில் உள்ள வீரர்களுக்கு வாய்ப்பளிக்கப்படும் என்றும், இளம் புயல் வைபவ் சூர்யவன்ஷி களமிறங்குவார் என்றும் ரசிகர்கள் மத்தியில் பெரும் எதிர்பார்ப்பு நிலவியது. ஆனால், தலைமைப் பயிற்சியாளர் கௌதம் கம்பீர் மற்றும் கேப்டன் ஸ்ரேயாஸ் ஐயர் கூட்டணி இந்திய அணியில் ஒரே ஒரு மாற்றத்தை மட்டுமே செய்து ரசிகர்களுக்கு ஏமாற்றமளித்துள்ளனர். முந்தைய ஆட்டத்தில் சஞ்சு சாம்சன் அதிரடி அரைசதம் அடித்ததால் தொடக்க ஜோடியில் கை வைக்க அணி நிர்வாகம் விரும்பவில்லை.

இந்திய அணியில் வேகப்பந்து வீச்சாளர் அர்ஷ்தீப் சிங்கிற்கு ஓய்வளிக்கப்பட்டு, அவருக்குப் பதிலாக இளம் வேகப்பந்து வீச்சாளர் யாஷ் தாக்கூர் சேர்க்கப்பட்டுள்ளார். மற்றபடி பேட்டிங் வரிசையில் எந்த மாற்றமும் செய்யப்படவில்லை. நட்சத்திர வேகப்பந்து வீச்சாளர் ஜஸ்பிரித் பும்ராவும் தொடர்ந்து அணியில் நீடிக்கிறார்.

டாஸ் நிகழ்வின் போது பேசிய இந்திய கேப்டன் ஸ்ரேயாஸ் ஐயர், "நாங்கள் முதலில் பேட்டிங் செய்யவே திட்டமிட்டிருந்தோம். இது எங்களுக்கு ஒரு சிறந்த சவாலாக இருக்கும். அணியில் அர்ஷ்தீப் சிங்கிற்குப் பதிலாக யாஷ் தாக்கூர் விளையாடுகிறார்" என்றார். ஆப்கானிஸ்தான் அணியில் குல்பதின் நைப் மற்றும் நூர் அகமது ஆகியோருக்குப் பதிலாக 2 மாற்றங்கள் செய்யப்பட்டுள்ளன.

இந்தியா பிளேயிங் லெவன்: சஞ்சு சாம்சன் (விக்கெட் கீப்பர்), அபிஷேக் சர்மா, இஷான் கிஷன், ஸ்ரேயாஸ் ஐயர் (கேப்டன்), திலக் வர்மா, நிதிஷ் குமார் ரெட்டி, சிவம் துபே, அக்சர் படேல், ரவி பிஷ்னோய், யாஷ் தாக்கூர், ஜஸ்பிரித் பும்ரா.

இந்த டி20 தொடரை 3-0 என முழுமையாகக் கைப்பற்றும் முனைப்பில் இந்திய அணி களமிறங்கியுள்ளது.