ஆதிதிராவிடர் மக்களுக்கு உதவுவதற்கு சமூக நீதி நல வாரியம் அமைக்க முடிவு: அமைச்சர் வன்னி அரசு அறிவிப்பு

சென்னை: சமூக நீதித்துறை அமைச்சர் வன்னி அரசு, வெளியிட்ட அறிவிப்பு விபரம்:

 பள்ளி விடுதி மாணவர்களுக்கு வழங்கப்படும், 1,400 ரூபாய் மாதாந்திர உணவுக் கட்டணம், 1,800 ரூபாயாகவும், கல்லுாரி விடுதி மாணவர்களுக்கு வழங்கப்படும் 1,500 ரூபாய், 2,000 ரூபாயாகவும் உயர்த்தி வழங்கப்படும்.

 சமூக நீதி ஆண்டு பராமரிப்பு தொகை 50,000 ரூபாய், 75,000 ரூபாயாகவும்; கல்லுாரி விடுதி பராமரிப்பு தொகை, 50,000 ரூபாய், ஒரு லட்சம் ரூபாயாகவும் உயர்த்தப்படும்

 150 சமூக நீதி விடுதிகள், 160 கோடி ரூபாயில் கட்டப்படும்

 ஆதிதிராவிட மக்கள் அதிகம் வசிக்கும் பகுதிகளில், 100 சமுதாயக் கூடங்கள் கட்டப்படும்

 பள்ளிகள் மற்றும் விடுதிகளில், சிறப்பாக பணிபுரியும் ஆசிரியர் மற்றும் காப்பாளர்களுக்கு, 'அறிவொளி ஆசிரியர் விருது' மற்றும் காப்பாளர் விருது' வழங்கப்படும்

 தொழில் முனைவோரை ஊக்குவிக்க, கோவையில் வணிக மையம்; சென்னை நந்தனத்தில், பழங்குடியினர் பண்பாட்டு மையம்; பள்ளி மற்றும் கல்லுாரி விடுதிகளில், 'அம்பேத்கர் படிப்பகம்' ஏற்படுத்தப்படும்

 நல உதவிகளை வழங்க, 'சமூக நீதி நல வாரியம்' அமைக்கப்படும்

 'சமூக நீதி அறக்கட்டளை' உருவாக்கப்படும்

 வீடற்ற துாய்மைப் பணியாளர்களுக்கு, சொந்த வீடு வழங்க, 'அகம்' திட்டம் அறிமுகப்படுத்தப்பட்டு, 2,500 கான்கிரீட் வீடுகள் வழங்கப்படும்

 வீடற்ற பழங்குடியினருக்கு, 2,000 கான்கிரீட் வீடுகள் கட்டித்தர, 'உறையுள்' திட்டம் செயல்படுத்தப்படும்

 வீடற்ற ஆதிதிராவிடர் குடும்பத்தினருக்கு, 5,000 கான்கிரீட் வீடுகள் கட்டி தரப்படும்

 விடுதி மாணவர்களுக்கு விளையாட்டு பயிற்சி அளிக்க, 'தீரம் - விளையாட்டு ஊக்கத் திட்டம்' அறிமுகப்படுத்தப்படும்

 சென்னை, ராமேஸ்வரம், துாத்துக்குடி, கோவளம் பகுதியில், 'சிகரம் - சிறப்பு விளையாட்டுத் திறன் மேம்பாட்டு திட்டம்' அறிமுகப்படுத்தப்படும்

 மலைப்பகுதிகளில், 'பூம்பொழில் தங்கும் வசதிகள்' ஏற்படுத்தப்படும்

 பழங்குடியின மக்கள் உற்பத்தி செய்யும் பொருட்களை, மதிப்பு கூட்டுதல் செய்ய, 25 மதிப்பு கூட்டல் அலகுகள், 12.50 கோடி ரூபாயில் நிறுவப்படும். பழங்குடியின விளை பொருட்கள், 'முல்லை' என்ற பெயரில் சந்தைப்படுத்தப்படும்

 சிறுதானியங்களின் விதைகளை ஆய்வு செய்து ஆவணப்படுத்த, 'மரபு விதை பாதுகாப்பு திட்டம்' உருவாக்கப்படும்

 'சிறப்பு கூட்டுறவு சங்கங்கள்' உருவாக்கப்படும்.

இவ்வாறு, அமைச்சர் அறிவித்தார்.