சட்டப்பேரவையில் இன்று டாஸ்மாக் ஊழல் குறித்து கேள்விகள் எழுமா? திமுகவின் பதில் என்ன?
சட்டப்பேரவையில் இன்று டாஸ்மாக் ஊழல் குறித்து கேள்விகள் எழுமா? திமுகவின் பதில் என்ன?
டாஸ்மாக், விவசாய கடன், மகளிர் உரிமைத்தொகை உள்ளிட்ட முக்கிய விவகாரங்களுடன் இன்று சட்டப்பேரவையில் அனல் பறக்கும் காரசார விவாதங்கள் நடக்க வாய்ப்பு...
தமிழ்நாடு சட்டப்பேரவையில் மானியக் கோரிக்கை விவாதங்கள் தீவிரமாக நடைபெற்று வரும் நிலையில், 2 நாள் விடுமுறைக்குப் பிறகு சட்டப்பேரவை இன்று மீண்டும் கூடுகிறது. இன்று மாற்றுத்திறனாளிகள் நலத்துறை, மதுவிலக்கு மற்றும் ஆயத்தீர்வைத் துறை, சமூக நலன் மற்றும் மகளிர் உரிமைத்துறை, வேளாண்மை மற்றும் உழவர் நலத்துறை ஆகிய 4 முக்கிய துறைகளுக்கான மானியக் கோரிக்கைகள் குறித்து விவாதம் நடைபெற உள்ளது.
தவெக - திமுக இடையே காரசார விவாதம்:
சட்டப்பேரவை கூட்டத்தொடர் தொடங்கிய நாள் முதல் ஆளுங்கட்சியான தவெக மற்றும் எதிர்க்கட்சியான திமுக இடையே கடும் அரசியல் வாதங்கள் நடைபெற்று வருகின்றன. இரு தரப்பினரும் ஒருவருக்கொருவர் பல்வேறு குற்றச்சாட்டுகளை முன்வைத்து வருகின்றனர்.
அமைச்சர்கள் மற்றும் எதிர்க்கட்சி உறுப்பினர்கள் இடையே நடைபெறும் விவாதங்கள் பல நேரங்களில் பரபரப்பை ஏற்படுத்தி வருகின்றன. ஆட்சி பொறுப்பேற்று 4 மாதங்களே ஆன நிலையில், தவெக அரசின் செயல்பாடுகளை எதிர்க்கட்சிகள் விமர்சித்து வருகின்றன. அதே நேரத்தில், திமுக ஆட்சிக் கால திட்டங்கள் மற்றும் செயல்பாடுகள் குறித்து தவெக தரப்பும் கேள்விகளை எழுப்பி வருகிறது.
தவெக அரசின் முதல் பட்ஜெட் தாக்கல்:
தமிழ்நாட்டில் நடைபெற்ற சட்டமன்றத் தேர்தல் முடிவுகள் அரசியல் களத்தில் பெரிய மாற்றத்தை ஏற்படுத்தியது. திமுக மற்றும் அதிமுகவை பின்னுக்குத் தள்ளி தவெக ஆட்சியை கைப்பற்றியது அரசியல் வட்டாரத்தில் பெரும் கவனத்தை பெற்றது.
ஆட்சிப் பொறுப்பேற்ற பிறகு தவெக அரசு தனது முதல் பட்ஜெட்டை ஆகஸ்ட் 5ஆம் தேதி தாக்கல் செய்தது. தொடர்ந்து ஆகஸ்ட் 6ஆம் தேதி வேளாண் பட்ஜெட்டும் தாக்கல் செய்யப்பட்டது. இதையடுத்து பட்ஜெட் மீதான விவாதங்கள் மற்றும் அமைச்சர்களின் பதில் உரைகள் நடைபெற்றன.
32 துறைகளின் மானியக் கோரிக்கைகள் நிறைவு:
சட்டப்பேரவையில் கடந்த 17ஆம் தேதி முதல் துறை வாரியாக மானியக் கோரிக்கை விவாதங்கள் நடைபெற்று வருகின்றன. இதுவரை 32 துறைகளுக்கான மானியக் கோரிக்கை விவாதங்கள் நிறைவடைந்துள்ளன.
ஒவ்வொரு நாளும் பல்வேறு துறைகளுக்கான கோரிக்கைகள் எடுத்துக்கொள்ளப்பட்டு, அமைச்சர்கள் தங்களது துறைகளின் திட்டங்கள் மற்றும் எதிர்கால நடவடிக்கைகள் குறித்து விளக்கம் அளித்து வருகின்றனர். சில நாட்களில் சட்டப்பேரவை நிகழ்வுகள் இரவு 7.20 மணி வரை நீடித்தன.
விடுமுறைக்கு பிறகு இன்று மீண்டும் சட்டப்பேரவை:
சனி மற்றும் ஞாயிற்றுக்கிழமை விடுமுறையை தொடர்ந்து இன்று காலை 9.30 மணிக்கு தமிழ்நாடு சட்டப்பேரவை மீண்டும் கூடுகிறது. வழக்கம்போல் முதலில் கேள்வி நேரம் நடைபெறும். உறுப்பினர்கள் எழுப்பும் கேள்விகளுக்கு சம்பந்தப்பட்ட அமைச்சர்கள் பதில் அளிப்பார்கள்.
அதன்பிறகு 4 முக்கிய துறைகளுக்கான மானியக் கோரிக்கை மீதான விவாதம் நடைபெற உள்ளது.
முக்கிய பிரச்சனைகள் குறித்து கேள்விகள் எழ வாய்ப்பு:
இன்றைய விவாதத்தில் மதுவிலக்கு மற்றும் ஆயத்தீர்வைத் துறை தொடர்பாக பல்வேறு கேள்விகளை எழுப்ப திமுக உள்ளிட்ட எதிர்க்கட்சிகள் திட்டமிட்டுள்ளதாக கூறப்படுகிறது. குறிப்பாக டாஸ்மாக் நிர்வாகம், மதுவிற்பனை கட்டுப்பாடு உள்ளிட்ட விவகாரங்கள் குறித்து விவாதம் நடைபெற வாய்ப்பு உள்ளது.
மேலும் தவெக தேர்தல் வாக்குறுதிகளில் இடம்பெற்ற விவசாய கடன் தள்ளுபடி, காவிரி நீர் பிரச்சனை, விவசாயிகளுக்கான திட்டங்கள் உள்ளிட்டவை குறித்தும் எதிர்க்கட்சி உறுப்பினர்கள் கேள்வி எழுப்ப உள்ளனர்.
அதேபோல், பெண்களுக்கு வழங்கப்படும் மகளிர் உரிமைத் தொகையை ரூ.2,500 ஆக உயர்த்துவது தொடர்பான தவெக தேர்தல் வாக்குறுதி குறித்தும் எதிர்க்கட்சிகள் அரசின் நிலைப்பாட்டை கேட்க உள்ளதாக தகவல்கள் தெரிவிக்கின்றன.
இன்றைய மானியக் கோரிக்கை விவாதங்களுக்கான துறைகளும் அதன் அமைச்சர்களும்,
* மாற்றுத்திறனாளிகள் நலத்துறை - முதலமைச்சர் ஜோசப் விஜய்,* மதுவிலக்கு மற்றும் ஆயத்தீர்வைத் துறை - அமைச்சர் க.விக்னேஷ்,* சமூக நலன் மற்றும் மகளிர் உரிமைத்துறை - அமைச்சர் கு.ஜெகதீஸ்வரி,* வேளாண்மை மற்றும் உழவர் நலத்துறை - அமைச்சர் ர.வினோத்
ஆகியோர் பதில் அளிக்க உள்ளனர்.
மேலும், விவாதத்தின் போது தங்களது துறைகளுக்கான புதிய அறிவிப்புகளையும் அமைச்சர்கள் வெளியிடுவார்கள் என எதிர்பார்க்கப்படுகிறது.
மொத்தத்தில், இன்று நடைபெறும் சட்டப்பேரவை கூட்டத்தில் டாஸ்மாக், விவசாயம், மகளிர் உரிமைத்தொகை உள்ளிட்ட முக்கிய விவகாரங்கள் குறித்து சூடான விவாதம் நடைபெறும் என அரசியல் வட்டாரங்கள் எதிர்பார்க்கின்றன.