இங்கிலாந்து மண்ணில் மானவ் சுதர் அபாரம்.. கவுண்டி கிரிக்கெட்டில் 2வது முறையாக 5 விக்கெட் வீழ்த்தினார்
இங்கிலாந்து மண்ணில் மானவ் சுதர் அபாரம்.. கவுண்டி கிரிக்கெட்டில் 2வது முறையாக 5 விக்கெட் வீழ்த்தினார்
லண்டன்: சர்வதேச டெஸ்ட் கிரிக்கெட்டில் முத்திரை பதித்த இந்திய ஆல்ரவுண்டர் மானவ் சுதர், கவுண்டி கிரிக்கெட்டிலும் தனது சிறந்த பார்மை தொடர்ந்து வருகிறார். கவுண்டி சாம்பியன்ஷிப் போட்டியில் எசெக்ஸ் அணிக்கு எதிரான ஆட்டத்தில் வார்விக்ஷயர் அணிக்காக விளையாடிய அவர், இரண்டாவது முறையாக 5 விக்கெட் வீழ்த்தி அசத்தினார். இதன் மூலம் வார்விக்ஷயர் அணி 8 விக்கெட் வித்தியாசத்தில் அபார வெற்றி பெற உதவினார்.
வார்விக்ஷயர் அணி தனது முதல் இன்னிங்ஸில் 191 ரன்கள் மட்டுமே எடுத்து தடுமாறியது. இதனால் போட்டி விறுவிறுப்பான கட்டத்தை எட்டியபோது, மானவ் சுதர் மீண்டும் ஒருமுறை அபாரமாக பந்துவீசி, இந்த தொடரில் தனது இரண்டாவது 5 விக்கெட் சாதனையை பதிவு செய்தார்.
எசெக்ஸ் அணியின் அதிகபட்சமாக வால்டரை 42 ரன்களிலும், தென்னாப்பிரிக்க அணியின் முன்னாள் கேப்டனும் அனுபவமிக்க தொடக்க ஆட்டக்காரருமான டீன் எல்கரை 29 ரன்களிலும் சுதர் ஆட்டமிழக்கச் செய்தார். இந்த இரண்டு முக்கிய விக்கெட்டுகளை ஆரம்பத்திலேயே வீழ்த்திய உற்சாகத்தில், எசெக்ஸ் அணியின் எஞ்சிய பேட்டிங் வரிசையையும் சுதர் சுருட்டினார்.
தனது 24 ஓவர்களில் 75 ரன்கள் மட்டுமே கொடுத்து 5 விக்கெட்டுகளை வீழ்த்தி அசத்தினார் சுதர். இதனால் எசெக்ஸ் அணி தனது இரண்டாவது இன்னிங்ஸில் 189 ரன்களுக்கு ஆல்-அவுட் ஆனது. 133 ரன்கள் எடுத்தால் வெற்றி என்ற எளிய இலக்குடன் களம் இறங்கிய வார்விக்ஷயர் அணி, 26 ஓவர்களில் 2 விக்கெட்டுகளை மட்டுமே இழந்து இலக்கை எட்டிப்பிடித்தது.
டெஸ்ட் கிரிக்கெட்டில் மானவ் சுதர் மிகச்சிறந்த ஃபார்மில் உள்ளார். கடந்த ஜூன் மாதம் ஆப்கானிஸ்தானுக்கு எதிராக நடைபெற்ற ஒரே ஒரு டெஸ்ட் போட்டியில் அறிமுகமான அவர், சர்வதேச அரங்கில் தனது முத்திரையை உடனடியாகப் பதித்தார்.
அதனைத் தொடர்ந்து ஆகஸ்ட் மாதம் இலங்கைக்கு எதிரான டெஸ்ட் தொடரிலும் சுதர் தனது சிறப்பான ஆட்டத்தை வெளிப்படுத்தினார். காலே மைதானத்தில் நடைபெற்ற தொடரின் முதல் போட்டியில், இரண்டாவது இன்னிங்ஸில் 6 விக்கெட்டுகள் உட்பட ஒட்டுமொத்தமாக 10 விக்கெட்டுகளை வீழ்த்தி, இந்தியாவின் 165 ரன்கள் வித்தியாசத்திலான வெற்றிக்கு முக்கிய காரணமாக அமைந்தார்.
வார்விக்ஷயர் அணிக்காக இதுவரை 5 போட்டிகளில் விளையாடியுள்ள சுதர், 2.79 எகானமியில் 26 விக்கெட்டுகளைக் கைப்பற்றியுள்ளார். இது லெஸ்டர்ஷயர் அணிக்காக விளையாடி வரும் நியூசிலாந்தின் அஜாஸ் படேலை விட சிறந்த புள்ளிவிவரமாகும். அஜாஸ் படேல் 9 போட்டிகளில் 3.27 எகானமியில் 25 விக்கெட்டுகளை வீழ்த்தியுள்ளார்.
இதற்கிடையில், டிவிஷன் 2 போட்டியில் மிடில்செக்ஸ் அணிக்கு எதிராக விளையாடிய க்ளௌசெஸ்டர்ஷயர் அணியின் ஆர். சாய் கிஷோர், 131 பந்துகளில் 71 ரன்கள் எடுத்து சிறப்பான ஆட்டத்தை வெளிப்படுத்தினார். இவரது பொறுப்பான ஆட்டத்தால் க்ளௌசெஸ்டர்ஷயர் அணி முதல் இன்னிங்ஸ் பின்தங்கிய நிலையை வெறும் 30 ரன்களாகக் குறைக்க முடிந்தது.