OTT: சீனியர் போலீஸ் அதிகாரிகளால் அவமானம்... வினையாய் முடியும் விளையாட்டு; மிரட்டும் வாரண்ட்!

திரைப்படங்களை விட தற்போது ஓடிடி வெப் தொடர்களுக்கே ரசிகர்கள் மத்தியில் அதிக வரவேற்பு கிடைத்து வருகிறது. குறிப்பாக உண்மை சம்பவங்களை தழுவி உருவாக்கப்படும் திரில்லர் கதைகள் ரசிகர்களை அதிகமாக ஈர்க்கின்றன. அந்த வகையில் சமீபத்தில் வெளியாகி கவனம் பெற்று வரும் வெப் தொடர் தான் ‘வாரண்ட்’. சஸ்பென்ஸ், எமோஷன், காவல்துறை வாழ்க்கையின் மறுபக்கம், நகைச்சுவை என அனைத்தையும் கலந்த இந்த தொடர் தற்போது ஓடிடி ரசிகர்களின் பாராட்டுகளை பெற்று வருகிறது.

‘விலங்கு’ வெற்றிக்கு பிறகு பிரசாந்த் பாண்டியராஜின் அடுத்த அதிரடி

இயக்குநர் பிரசாந்த் பாண்டியராஜ் ஏற்கனவே விமல் நடிப்பில் வெளியான ‘விலங்கு’ வெப் தொடரின் மூலம் ரசிகர்களின் கவனத்தை பெற்றவர். கிராமத்து பின்னணியில் உருவான அந்த சஸ்பென்ஸ் திரில்லர் தொடர் விமர்சகர்களிடமும் நல்ல வரவேற்பைப் பெற்றது. அதன்பிறகு சூரி நடித்த ‘மாமன்’ திரைப்படத்தையும் இயக்கி வெற்றி கண்டார். தற்போது அவர் இயக்குநராக மட்டுமல்லாமல் நடிகராகவும் ‘வாரண்ட்’ தொடரின் மூலம் புதிய முயற்சியில் இறங்கியுள்ளார்.

முக்கிய நட்சத்திரங்கள் இணைந்துள்ள ‘வாரண்ட்’

இந்த தொடரில் பிரசாந்த் பாண்டியராஜ் நாயகனாக நடித்துள்ள நிலையில், அனுபவம் மிக்க நடிகர் பாலாஜி சக்திவேல் முக்கிய கதாபாத்திரத்தில் நடித்துள்ளார். மேலும் கவுசல்யா, அருள்தாஸ், ஹலோ கந்தசாமி உள்ளிட்ட பலரும் தங்களின் இயல்பான நடிப்பால் கதைக்கு வலு சேர்த்துள்ளனர். இசையமைப்பாளர் சாம் சிஎஸ் பின்னணி இசையின் மூலம் திரில்லர் உணர்வை மேலும் அதிகரித்துள்ளார். பல காட்சிகளில் அவரது இசை ரசிகர்களுக்கு பதட்டத்தையும் பரபரப்பையும் ஏற்படுத்துகிறது.

அரசு வேலை கனவுடன் போராடும் இளைஞன்

கதையின் மையத்தில் இருக்கும் பிரசாந்த், தனது தந்தையின் ஒரே மகனாக வாழ்ந்து வருகிறார். மகன் எப்படியாவது அரசு வேலையில் சேர வேண்டும் என்பதே தந்தையின் மிகப்பெரிய ஆசை. இதற்காக பிரசாந்த் தொடர்ந்து பல அரசு தேர்வுகளை எழுதுகிறார். இரவும் பகலும் உழைத்தும் அவருக்கு வெற்றி மட்டும் கிடைக்கவில்லை. ஒவ்வொரு தோல்வியும் அவரை மனதளவில் பாதிக்கிறது. இருப்பினும் குடும்பத்தின் எதிர்பார்ப்புக்காக அவர் தொடர்ந்து முயற்சி செய்து கொண்டே இருக்கிறார்.

காவல்துறை வாழ்க்கையில் எதிர்கொள்ளும் அவமானங்கள்

இறுதியில் உறவினரின் உதவியுடன் காவல்துறையில் கடைநிலை காவலராக பணியில் சேரும் பிரசாந்த், அங்கு முற்றிலும் வேறொரு உலகத்தை சந்திக்கிறார். காவல் நிலைய அரசியல், மேல் அதிகாரிகளின் அழுத்தம், அவமானங்கள், கீழ்நிலை காவலர்களின் துயரமான வாழ்க்கை போன்றவை அவரை மன உளைச்சலுக்கு உள்ளாக்குகின்றன. வேலைக்கே விருப்பமின்றி போகும் அளவுக்கு அவர் சோர்வடைகிறார்.

அதன்பிறகு அவர் வேலைவிட்டு வெளியேற சில சில்லறை முயற்சிகளை செய்கிறார். ஆனால் அவை எதிர்பாராத பிரச்சனைகளாக மாறி அவரையே சிக்கலில் தள்ளுகின்றன. இதன் பின்னர் கதையில் தொடர் திருப்பங்கள், சஸ்பென்ஸ் மற்றும் பரபரப்பான சம்பவங்கள் இடம் பெறுகின்றன.

காவல்துறையின் மறைக்கப்பட்ட உண்மைகள்

இந்த தொடரின் மிகப்பெரிய பலமே அதன் இயல்பான திரைக்கதை. காவல்துறையில் கீழ்நிலை பணியாளர்கள் சந்திக்கும் மன அழுத்தம், வேலை அழுத்தம், மரியாதையின்மை, குடும்ப பிரச்சனைகள் போன்ற பல விஷயங்களை மிக நெருக்கமாக பதிவு செய்திருக்கிறார் இயக்குநர். அதே சமயம் சீரியஸான கதையில் இடையிடையே வரும் நகைச்சுவை காட்சிகள் ரசிகர்களுக்கு சலிப்பில்லாத அனுபவத்தை தருகின்றன.

இந்த வீக் எண்ட் பாக்க வேண்டிய வெப் தொடர்!

பரபரப்பான திரைக்கதை, யதார்த்தமான நடிப்பு, எதிர்பாராத திருப்பங்கள் மற்றும் சினிமா தரத்தில் உருவாக்கப்பட்ட காட்சிகள் ஆகியவை ‘வாரண்ட்’ தொடரை ஓடிடி ரசிகர்கள் மத்தியில் பேசுபொருளாக மாற்றியுள்ளது. குறிப்பாக ‘விலங்கு’ போன்ற தரமான திரில்லர் தொடர்களை விரும்புபவர்கள் இந்த தொடரை கண்டிப்பாக ரசிப்பார்கள் என கூறப்படுகிறது.

இந்த சுவாரஸ்யமான ‘வாரண்ட்’ வெப் தொடரை தற்போது ஜீ 5 ஓடிடி தளத்தில் காணலாம். இந்த வீக் எண்ட் பார்க்க வேண்டிய தரமான தமிழ் திரில்லர் தொடர்களில் இதுவும் ஒன்று என்பதில் சந்தேகமில்லை.