டெல்லிக்கு ஷாக் கொடுக்கப் போகும் தமிழ்நாடு? முதல்வர் விஜய் தலைமையில் கூடும்

டெல்லிக்கு ஷாக் கொடுக்கப் போகும் தமிழ்நாடு? முதல்வர் விஜய் தலைமையில் கூடும் அவசர ஆலோசனைக் கூட்டம்!

"தொகுதி மறுவரையறை விவகாரம், சென்னை கலைவாணர் அரங்கில் முதல்வர் விஜய் தலைமையில் தமிழக எம்பிக்கள் ஆலோசனை கூட்டம் நடைபெறுகிறது."

Tamil Nadu Delimitation Meeting: மத்திய அரசு மேற்கொள்ள உத்தேசித்து வரும் தொகுதி மறுவரையறை (Delimitation) நடவடிக்கை மற்றும் அதன் மூலம் தமிழ்நாட்டின் நாடாளுமன்றப் பிரதிநிதித்துவத்திற்கு ஏற்படக்கூடிய பாதிப்புகள் குறித்து விவாதிப்பதற்காக, தமிழகத்தைச் சேர்ந்த அனைத்து நாடாளுமன்ற உறுப்பினர்களின் ஆலோசனைக் கூட்டம் இன்று நடைபெறுகிறது. சென்னை சேப்பாக்கத்தில் உள்ள கலைவாணர் அரங்கத்தின் 3-வது தளத்தில் பிற்பகல் 3:00 மணிக்குத் தொடங்கும் இக்கூட்டத்திற்குத் தமிழக முதல்வர் விஜய் தலைமை தாங்குகிறார். டெல்லியில் உள்ள தமிழ்நாடு இல்லத்தின் மூலம் மாநிலத்தின் அனைத்து மக்களவை மற்றும் மாநிலங்களவை எம்பிக்களுக்கும் இதற்கான அதிகாரப்பூர்வ அழைப்பு விடுக்கப்பட்டுள்ளது.

தமிழ்நாட்டின் 39 மக்களவைத் தொகுதிகளைப் பிரதிநிதித்துவப்படுத்தும் உறுப்பினர்களில், அதிகபட்சமாக எதிர்க்கட்சியாக உள்ள திமுக சார்பில் 22 எம்பிக்கள் இடம்பெற்றுள்ளனர். காங்கிரஸ் கட்சி சார்பில் 9 எம்பிக்களும், விடுதலைச் சிறுத்தைகள் கட்சி (விசிக) சார்பில் 2 எம்பிக்களும், இந்திய கம்யூனிஸ்ட் கட்சி (சிபிஐ) சார்பில் 2 எம்பிக்களும், மார்க்சிஸ்ட் கம்யூனிஸ்ட் கட்சி (சிபிஎம்) சார்பில் 2 எம்பிக்களும் பங்கேற்க அழைப்பு விடுக்கப்பட்டுள்ளது. மேலும், மறுமலர்ச்சி திராவிட முன்னேற்றக் கழகம் (மதிமுக) சார்பில் ஒரு எம்பியும், இந்திய யூனியன் முஸ்லிம் லீக் (ஐயுஎம்எல்) சார்பில் ஒரு எம்பியும் மக்களவை உறுப்பினர்களாக இக்கூட்டத்தில் கலந்துகொள்ள உள்ளனர்.

மாநிலங்களவையைப் பொறுத்தவரை, தமிழ்நாட்டைச் சேர்ந்த 18 உறுப்பினர்களில் திமுக சார்பில் 8 எம்பிக்கள் இடம்பெற்றுள்ளனர். அதிமுக சார்பில் 4 எம்பிக்களும், காங்கிரஸ் கட்சி சார்பில் 3 எம்பிக்களும் இதில் பங்கேற்கின்றனர். மேலும் பாட்டாளி மக்கள் கட்சி (பாமக) சார்பில் ஒரு எம்பியும், மக்கள் நீதி மய்யம் (மநீம) சார்பில் ஒரு எம்பியும், தேசிய முற்போக்கு திராவிட கழகம் (தேமுதிக) சார்பில் ஒரு எம்பியும் இக்கூட்டத்தில் பங்கேற்க அழைக்கப்பட்டுள்ளனர்.

மக்கள் தொகை கணக்கெடுப்பின் அடிப்படையில் நாடாளுமன்றத் தொகுதிகளின் எல்லைகளையும் எண்ணிக்கையையும் மாற்றியமைக்கும் நடவடிக்கையை மத்திய அரசு துரிதப்படுத்தி வருகிறது. மக்கள் தொகையைக் கட்டுப்பாட்டுக்குள் கொண்டு வந்த தமிழ்நாடு போன்ற தென் மாநிலங்கள், இந்த தொகுதி மறுவரையறை நடவடிக்கையால் தங்களின் பிரதிநிதித்துவ இடங்களை இழக்கும் அபாயம் எழுந்துள்ளது. மக்கள் தொகையை மட்டுமே முதன்மை அளவுகோலாகக் கொண்டால் நாடாளுமன்றத்தில் தமிழ்நாட்டின் அரசியல் செல்வாக்கு குறையும் என்பதால், மாநில உரிமைகளைப் பாதுகாக்கும் நோக்கில் அனைத்துக் கட்சி எம்பிக்களின் ஒருமித்த கருத்தை உருவாக்க இந்த அவசரக் கூட்டம் கூட்டப்பட்டுள்ளதாக தெரிவிக்கப்பட்டுள்ளது.

இன்றைய ஆலோசனைக் கூட்டத்தில் தொகுதி மறுவரையறை மசோதாவால் மாநிலத்திற்கு ஏற்படும் அனைத்துவிதமான தாக்கங்கள் குறித்தும் விரிவாக விவாதிக்கப்பட உள்ளது. நாடாளுமன்றத்தில் இந்த மசோதா தாக்கல் செய்யப்படும்போது தமிழக எம்பிக்கள் அனைவரும் கட்சி வேறுபாடின்றி எந்த மாதிரியான கூட்டு நிலைப்பாட்டை எடுக்க வேண்டும் என்பது குறித்து முதல்வர் விஜய் ஆலோசனைகளை வழங்கி எம்பிக்களின் கருத்துகளைக் கேட்டறிய உள்ளார். இக்கூட்டத்தின் முடிவில் எடுக்கப்படும் தீர்மானங்கள், மத்திய அரசுக்கு தமிழ்நாட்டின் கோரிக்கையாகவும் அழுத்தமாகவும் கொண்டு செல்லப்படும் என எதிர்பார்க்கப்படுகிறது.

தலைப்பு செய்திகள்

ஃபோட்டோ கேலரி