தவெக ஆட்சியில் சட்டம் ஒழுங்கு சீரழிந்து ரத்த சகதியில் தமிழ்நாடு சிக்கியுள்ளது: மு.க.ஸ்டாலின் கண்டனம்

தவெக ஆட்சியில் சட்டம் ஒழுங்கு சீரழிந்து ரத்த சகதியில் தமிழ்நாடு சிக்கியுள்ளது: மு.க.ஸ்டாலின் கண்டனம்

சென்னை: தவெக ஆட்சியில் சட்டம் ஒழுங்கு சீரழிந்து, ரத்த சகதியில் தமிழ்நாடு சிக்கியுள்ளது, என மு.க.ஸ்டாலின் கண்டனம் தெரிவித்துள்ளார். திமுக தலைவருமான மு.க.ஸ்டாலின் வெளியிட்ட அறிக்கை: குற்றவாளிகள் தைரியமாகவும் பொதுமக்கள் அச்சத்தோடும் வாழும் சூழலுக்குத் தமிழ்நாடு தள்ளப்பட்டுள்ளதற்குச் சான்றாக கடந்த 24 மணி நேரத்தில் வெளியாகிய அதிர்ச்சி செய்திகள் அமைந்துள்ளன. சென்னை மயிலாப்பூரில் 19 வயது இளைஞர் சத்தியசீலன் வெட்டி படுகொலை செய்யப்பட்டுள்ளார்.

திருத்தணியில் தனது 17 வயது மகளுக்கு தொல்லை கொடுத்த நபர் மீது காவல் நிலையத்தில் புகாரளித்த தந்தை அவரது வீட்டின் முன்பே வைத்து படுகொலை செய்யப்பட்டுள்ளார். காவல் நிலையத்தில் புகார் அளித்தும் நடவடிக்கை எடுக்காமல் அலட்சியமாக இருந்ததால் இந்த கொலை நிகழ்ந்திருக்கிறது. சேலத்தில் வீட்டில் தனியாக இருந்த ஜனாபாய் எனும் மூதாட்டி பகலிலேயே கழுத்து நெரித்து கொலை செய்யப்பட்டிருக்கிறார். கொலையாளிகள் அவரது நகைகளைத் திருடிச் சென்றுள்ளனர்.

திண்டுக்கல் மாவட்டம் சாணார்பட்டி காவல் நிலையத்தில் ஜாமீன் கையெழுத்து போட்டுவிட்டு திரும்பும்போதே வீரபத்திரன் என்பவர் மர்ம நபர்களால் மனைவி முன்பு வைத்து சரமாரியாக வெட்டிக் கொலை செய்யப்பட்டுள்ளார். மதுரை மாவட்டம் சமயநல்லூர் அருகே மது போதையில் நிர்வாணமாக்கி வாலிபர் கொலை செய்யப்பட்டுள்ளார். சோழவந்தானில் டாஸ்மாக் கடை அருகே பைக்கில் வந்த சியாம் சுந்தர்ராஜன் வெட்டி படுகொலை செய்யப்பட்டுள்ளார். எண்ணூர் ரயில் நிலையத்திலேயே மாணவர்களை வெட்ட முயற்சி நடந்துள்ளது.

வடக்கு, தெற்கு, மேற்கு, தலைநகர் என எல்லா திசைகளிலும் குற்றச் சம்பவங்கள் கொடிகட்டி பறக்கின்றன. பட்டப்பகல், நள்ளிரவு எனப் பாகுபாடு இல்லாமல் தமிழ்நாடு ரத்தத்தில் தோய்ந்து போயுள்ளது. காவல்துறையினரால் ரோந்து பணி மேற்கொள்ளப்படுகிறதா இல்லையா?. சிங்கப்பெண் அதிரடிப் படையினர் ரீல்ஸ் போடுவதில் காட்டும் ஆர்வத்தை பெண்களின் பாதுகாப்பில் காட்டுவார்களா மாட்டார்களா?.

காவல் நிலையத்தில் புகாரளித்தும் நடவடிக்கை எடுக்கப்படாமல் புகார் தெரிவித்தவர்களே கொலைக்கு உள்ளாகும் அராஜகத்துக்கு முடிவு எப்போது?. தமிழ்நாட்டின் சட்டம் ஒழுங்கு நாளாக, நாளாக மிக மிக ஆபத்தான கட்டத்தை நோக்கிச் சென்றுகொண்டிருக்கிறது. மக்களின் உயிரை காப்பதில் கவனம் செலுத்த வேண்டிய முதலமைச்சரின் கவனம் மொத்தமும் தனது நாற்காலியைக் காப்பாற்றுவதிலேயே இருக்கிறது.

அதற்கான விலையாக அப்பாவி மனித உயிர்கள் பலி கொடுக்கப்பட்டு வருகின்றன. காவல்துறைக்கு பொறுப்பு வகிக்கும் முதலமைச்சர், சாக்கு போக்கு சொல்லி தப்பிக்கும் காலம் எல்லாம் கடந்துவிட்டது. சூட்டிங் எண்ணத்திலிருந்து விடுபட்டு, தயவு செய்து நடவடிக்கை எடுங்கள் சிஎம் சார். இவ்வாறு தெரிவித்துள்ளார்.