உஷார் தமிழகமே! கடந்த 6 மாதத்தில் மட்டும் இத்தனை பேரா? அதிரவைக்கும் அதிர்ச்சிப்

உஷார் தமிழகமே! கடந்த 6 மாதத்தில் மட்டும் இத்தனை பேரா? அதிரவைக்கும் அதிர்ச்சிப் புள்ளிவிவரம்!

Snakebite cases in Tamil Nadu: "தமிழ்நாட்டில் பாம்புக் கடியால் 6 மாதத்தில் 7,297 பேர் பாதிப்படைந்துள்ளன் இதில் 6 பேர் உயிரிழந்தனர்."

தமிழகத்தில் கடந்த ஆறு மாதங்களில் பாம்புக் கடியால் 7,297 பேர் பாதிக்கப்பட்டுள்ளதாகவும், அதில் ஆறு பேர் உயிரிழந்துள்ளதாகவும் பொது சுகாதாரத் துறை அதிகாரிகள் தெரிவித்துள்ளனர். குறிப்பாக திருவண்ணாமலை, வேலூர், கிருஷ்ணகிரி, கோவை, திருச்சி உள்ளிட்ட மாவட்டங்களில் உள்ள விவசாய நிலங்கள் மற்றும் புதர் மண்டித் கிடக்கும் பகுதிகளில் இத்தகைய பாம்புக் கடி சம்பவங்கள் அதிகளவில் நடந்துள்ளன. கடந்த ஆண்டில் (முந்தைய ஆண்டு) பாம்புக் கடியால் மொத்தம் 19,795 பேர் பாதிக்கப்பட்டு, 43 பேர் உயிரிழந்தனர் என்பது குறிப்பிடத்தக்கது.

இந்த ஆண்டில் கடந்த ஆறு மாதங்களில் அதிகபட்சமாக திருவண்ணாமலை மாவட்டத்தில் 691 பேரும், கிருஷ்ணகிரியில் 572 பேரும் பாம்புக் கடியால் பாதிக்கப்பட்டுள்ளனர். இதனைத் தொடர்ந்து விழுப்புரத்தில் 485 பேர், திருச்சியில் 480 பேர், கோவையில் 411 பேர், தர்மபுரியில் 361 பேர் மற்றும் சென்னையில் 186 பேர் என மாநிலம் முழுவதும் மொத்தம் 7,297 பேர் பாதிக்கப்பட்டுள்ளனர். இவர்களில் ஆறு பேர் சிகிச்சை பலனின்றி உயிரிழந்துள்ளனர்.

தமிழகத்தில் விவசாய நிலங்கள் மற்றும் புதர் மண்டிய பகுதிகளில் வசிக்கும் மக்கள் நாகப் பாம்பு, கண்ணாடி விரியன், சுருட்டை விரியன், கட்டு விரியன் ஆகிய விஷப் பாம்புகளின் கடியால் அதிகளவில் பாதிக்கப்படுகின்றனர் என்று பொது சுகாதாரத் துறை அதிகாரிகள் கூறியுள்ளனர். பாம்புக் கடித்தவுடன் உடனடியாக மருத்துவமனைக்கு வருவோரில் 99 சதவீதம் பேர் காப்பாற்றப்படுகின்றனர். அதேநேரம், பாம்பு கடித்தது தெரியாமல் இருப்போரும், கடித்தவுடன் உடனடியாக மருத்துவமனைக்குச் செல்லாமல் சுய வைத்தியம் (கை வைத்தியம்) பார்ப்போரும் தான் உயிரிழக்க நேரிடுகிறது என்று அதிகாரிகள் எச்சரித்துள்ளனர்.

பாம்பு கடித்தால் பொதுமக்கள் யாரும் பதற்றமடையக் கூடாது. அவ்வாறு பதற்றமடைந்தால் இதயத் துடிப்பு அதிகரித்து, உடலில் விஷம் வேகமாகப் பரவக்கூடும். எனவே, பாதிக்கப்பட்டவரை முதலில் அமைதிப்படுத்தி, உடனடியாக அருகில் உள்ள மருத்துவமனைக்கு அழைத்துச் செல்ல வேண்டும். தமிழகத்தில் உள்ள அனைத்து ஆரம்ப சுகாதார நிலையங்களிலும், அரசு மருத்துவமனைகளிலும் 'பாம்பு விஷ முறிவு மருந்து' (Anti-snake venom) போதிய அளவில் கையிருப்பில் உள்ளது. இதனால், நேரத்தை வீணாக்காமல் உடனடியாக மருத்துவ சிகிச்சை பெற்றால், தேவையற்ற உயிரிழப்புகளை முற்றிலும் தவிர்க்கலாம் என்று பொது சுகாதாரத் துறை அதிகாரிகள் அறிவுறுத்தியுள்ளனர்.

தலைப்பு செய்திகள்

ஃபோட்டோ கேலரி