பாகிஸ்தான் பேட்டிங்கை வீழ்த்துவது எளிது.. கவுண்டி அணியை விட பலம் குறைவு.. இங்கி,வீரர் வாகன் கிண்டல்

பாகிஸ்தான் பேட்டிங்கை வீழ்த்துவது எளிது.. கவுண்டி அணியை விட பலம் குறைவு.. இங்கி,வீரர் வாகன் கிண்டல்

மும்பை: பாகிஸ்தான் அணியின் பேட்டிங் வரிசையை தான் நீண்ட காலத்தில் பார்த்த மிக எளிதான பேட்டிங் வரிசை என்று இங்கிலாந்து அணியின் முன்னாள் கேப்டன் மைக்கேல் வாகன் விமர்சித்துள்ளார். பெரிய அளவு பந்துவீசாமல், அதிக விக்கெட்டுகளைப் பெறலாம் என்பதை அறிந்ததால், பாகிஸ்தான் பேட்ஸ்மேன்களுக்கு பந்துவீசுவதற்கு இங்கிலாந்து பந்துவீச்சாளர்கள் வரிசையில் நிற்பதாக அவர் கிண்டல் அடித்துள்ளார்.

முதல் டெஸ்டில் இங்கிலாந்து அணி ஒரு இன்னிங்ஸ் மற்றும் 103 ரன்கள் வித்தியாசத்தில் வெற்றி பெற்றது. இதில் பாகிஸ்தான் அணி இரண்டு இன்னிங்ஸ்களிலும் முறையே 171 மற்றும் 135 ரன்களுக்கு ஆட்டமிழந்தது. தற்போது நடைபெற்று வரும் இரண்டாவது டெஸ்டில், பாபர் அசாம் தலைமையிலான அணி முதல் இன்னிங்ஸில் மீண்டும் 110 ரன்களுக்கு சுருண்டது. இங்கிலாந்து தனது இரண்டு இன்னிங்ஸ்களிலும் 290 மற்றும் 208 ரன்கள் எடுத்து, பாகிஸ்தானுக்கு 389 ரன்களை இலக்காக நிர்ணயித்துள்ளது.

இது குறித்து பேசிய வாகன், "நான் மிகவும் நேர்மையாக பேசுகிறேன். இங்கிலாந்து பந்துவீச்சாளர்கள் எந்த ஒரு சவாலையும் எதிர்கொள்ளவில்லை. இந்த பாகிஸ்தான் பேட்டிங் வரிசை, பந்துவீசுவதற்கு நான் நீண்ட காலத்தில் பார்த்த மிக எளிதான பேட்டிங் வரிசையாக இருக்கலாம். அதுமட்டுமின்றி, அங்கு எளிதாக விக்கெட்டுகள் கிடைக்கும் என்பதை இங்கிலாந்து பந்துவீச்சாளர்கள் அறிவார்கள்."

"அதனால்தான் அவர்கள் அனைவரும் பந்துவீச வரிசையில் நிற்கிறார்கள் என்று நான் நினைக்கிறேன். அவர்களால் இங்கிலாந்து பந்துவீச்சாளர்களுக்கு எந்த பாதிப்பும் ஏற்படப் போவதில்லை. அவர்களின் பந்துவீச்சு புள்ளிவிவரங்களைக் கெடுக்கும் அளவுக்கு எந்த ஒரு பேட்ஸ்மேனும் அங்கு இல்லை. இது 'யார் விக்கெட் எடுக்க விரும்புகிறார்கள்?' என்ற நிலையை ஒத்திருக்கிறது."

"பாகிஸ்தான் அணி பெரிய ஸ்கோரை எடுக்காது என்பது அவர்களுக்குத் தெரியும். எனவே, நீங்கள் 40 முதல் 50 ஓவர்கள் மட்டுமே பந்துவீச வேண்டியிருக்கும். இதனால், ஒவ்வொரு ஓவரிலும் உங்களது முழு திறமையையும் வெளிப்படுத்தி, கேப்டனிடம் சென்று, நான் இன்னும் ஒரு ஓவர் வீசுகிறேன் என்று கேட்கத் தோன்றும் வகையில் விக்கெட்டுகள் கொட்டிக்கிடக்கின்றன," என்றார்.

"இங்கிலாந்து பந்துவீச்சாளர்கள் சிறப்பாகச் செயல்பட்டு இன்னும் அச்சுறுத்தலாகவே இருக்கிறார்கள். இதேபோல் பந்துவீசினால், இந்த பந்துவீச்சு கூட்டணி உலகின் சிறந்த பேட்டிங் வரிசைகளுக்கும் சவால் அளிக்கும். ஆனால், இது பாகிஸ்தானின் பேட்டிங். இது என்ன இரண்டாம் பிரிவு கவுண்டி கிரிக்கெட்டா? அவர்கள் விளையாடும் விதம் எவ்வகையிலும் ஒரு டெஸ்ட் போட்டிக்கான பேட்டிங் வரிசை என்று சொல்லும் தரத்தில் இல்லை," என்று அவர் கூறினார்.