தலைமைச் செயலகம் இடமாற்றம்? பட்டினப்பாக்கம் முதல் கிண்டி வரை பரிசீலனையில்

தலைமைச் செயலகம் இடமாற்றம்? பட்டினப்பாக்கம் முதல் கிண்டி வரை பரிசீலனையில் முக்கிய இடங்கள்!

Tamil Nadu New Secretariat Building: "புதிய தலைமைச் செயலகம், தமிழக அரசின் முக்கிய அறிவிப்பு, விரைவில் வெளியாகும் என எதிர்பார்க்கப்படுகிறது."

தமிழகத்தில் புதிய தலைமைச் செயலக வளாகம் அமைப்பது தொடர்பான முக்கிய அறிவிப்பு, தற்போதைய சட்டப்பேரவைக் கூட்டத்தொடரிலேயே வெளியாக உள்ளதாக அதிகாரப்பூர்வ வட்டாரங்கள் தெரிவித்துள்ளன. சென்னை செயின்ட் ஜார்ஜ் கோட்டையில் தற்போது செயல்பட்டு வரும் தலைமைச் செயலகத்தில் இடநெருக்கடி மற்றும் அலுவலகப் பணிகளில் ஏற்படும் சிரமங்களை குறைக்கும் வகையில், புதிய தலைமைச் செயலக வளாகத்தை அமைப்பதற்கான நடவடிக்கைகள் தீவிரப்படுத்தப்பட்டுள்ளதாக கூறப்படுகிறது.

புதிய தலைமைச் செயலகம் அமைக்கப்பட உள்ள இடம் இதுவரை இறுதி செய்யப்படவில்லை. சென்னை பட்டினப்பாக்கம், கிண்டி ரேஸ் கோர்ஸ் உள்ளிட்ட சில முக்கிய பகுதிகளை அரசு பரிசீலித்து வருவதாக தகவல்கள் வெளியாகியுள்ளன. நிர்வாக ரீதியாகவும், போக்குவரத்து வசதிகள் மற்றும் அரசு அலுவலகங்களின் ஒருங்கிணைந்த செயல்பாட்டுக்கும் ஏற்ற இடத்தை தேர்வு செய்வதில் அரசு கவனம் செலுத்தி வருவதாக கூறப்படுகிறது.

புதிய வளாகம் அமைக்கப்பட்டால், தலைமைச் செயலகத்தின் பல்வேறு துறைகள் ஒரே வளாகத்தில் நவீன வசதிகளுடன் செயல்படுவதற்கான வாய்ப்பு உருவாகும். இதன் மூலம் அரசு நிர்வாகப் பணிகளை ஒருங்கிணைப்பதுடன், தற்போதைய செயின்ட் ஜார்ஜ் கோட்டையில் நிலவும் இடநெருக்கடியையும் குறைக்க முடியும் என எதிர்பார்க்கப்படுகிறது.

தமிழகத்தில் புதிய தலைமைச் செயலகத்தை அமைப்பதற்கான முயற்சி தற்போது தொடங்கியது அல்ல. இதற்கு முன்னரும் பல்வேறு காலகட்டங்களில் புதிய தலைமைச் செயலகம் அமைப்பதற்கான திட்டங்கள் முன்வைக்கப்பட்டுள்ளன. 2003-ஆம் ஆண்டு ஜனவரி 31-ஆம் தேதி அப்போதைய முதல்வர் ஜெயலலிதா, சென்னையில் உள்ள குயின் மேரிஸ் கல்லூரி வளாகத்தில் புதிய தலைமைச் செயலகம் அமைப்பது தொடர்பாக அறிவித்தார். ஆனால், கல்லூரி மாணவிகள் மற்றும் பல்வேறு தரப்பினரிடையே ஏற்பட்ட கடுமையான எதிர்ப்பைத் தொடர்ந்து அந்தத் திட்டம் கைவிடப்பட்டது.

இதையடுத்து முன்னாள் முதல்வர் மு. கருணாநிதி தலைமையிலான ஆட்சிக் காலத்தில் சென்னை ஓமந்தூரார் அரசுத் தோட்டத்தில் புதிய தலைமைச் செயலக வளாகம் கட்டப்பட்டது. புதிய கட்டடம் பயன்பாட்டுக்கு வந்த நிலையில், 2011-ஆம் ஆண்டு ஆட்சி மாற்றத்திற்குப் பிறகு அந்த வளாகம் தலைமைச் செயலகமாக தொடர்ந்து பயன்படுத்தப்படாமல், பன்னோக்கு உயர் சிறப்பு மருத்துவமனையாக மாற்றப்பட்டது. இதனால் தலைமைச் செயலகம் மீண்டும் செயின்ட் ஜார்ஜ் கோட்டையிலேயே தொடர்ந்து செயல்பட்டு வருகிறது.

புதிய தலைமைச் செயலகத்திற்கான இடம் மற்றும் திட்டம் தொடர்பான இறுதி முடிவு எடுக்கப்படும் வரை, முதலமைச்சர் அலுவலகத்தை தற்காலிகமாக நாமக்கல் கவிஞர் மாளிகைக்கு மாற்ற அரசு திட்டமிட்டுள்ளதாக கூறப்படுகிறது. குறிப்பாக, அந்தக் கட்டடத்தின் 10-வது தளத்தில் முதலமைச்சர் அலுவலகத்தை அமைப்பதற்கான பணிகளை மேற்கொள்ள திட்டமிடப்பட்டுள்ளதாக தகவல்கள் தெரிவிக்கின்றன.

இந்த மாற்றத்தை டிசம்பர் முதல் வாரத்திற்குள் மேற்கொள்ள திட்டமிடப்பட்டுள்ளதாகவும், அதற்கான சீரமைப்பு மற்றும் உள்கட்டமைப்பு பணிகள் தொடர்பாக பொதுப்பணித்துறை ஆலோசித்து வருவதாகவும் கூறப்படுகிறது. இந்த பணிகளுக்கான நிதியை எவ்வாறு பயன்படுத்துவது என்பது குறித்தும் அதிகாரிகள் பரிசீலித்து வருவதாக தகவல்கள் வெளியாகியுள்ளன.

முதலமைச்சர் அலுவலகம் வேறு இடத்திற்கு மாற்றப்படுவதால், செயின்ட் ஜார்ஜ் கோட்டையில் செயல்பட்டு வரும் பிற அரசு அலுவலகங்களின் பணியாளர்களுக்கு ஏற்படக்கூடிய அசௌகரியங்களும் கவனத்தில் கொள்ளப்பட்டுள்ளன. இதன் காரணமாக, சில அரசு அலுவலகங்களை இடமாற்றம் செய்யும் நடவடிக்கைகள் தற்காலிகமாக தள்ளிவைக்கப்பட்டுள்ளதாக கூறப்படுகிறது.

அதே நேரத்தில், முதலமைச்சர் அலுவலகத்திற்கு மிகவும் அருகில் செயல்படும் சில அலுவலகங்களை மட்டும் தற்போதைய வளாகத்திற்குள்ளேயே வேறு இடங்களுக்கு மாற்றுவதற்கான ஏற்பாடுகள் செய்யப்பட உள்ளதாக தெரிகிறது.

புதிய தலைமைச் செயலகம் அமைப்பது தொடர்பான திட்டம் நீண்ட காலமாக தமிழக அரசியல் மற்றும் நிர்வாக வட்டாரங்களில் பேசப்பட்டு வரும் நிலையில், தற்போதைய சட்டப்பேரவைக் கூட்டத்தொடரில் இதற்கான அதிகாரப்பூர்வ அறிவிப்பு வெளியாகும் என எதிர்பார்ப்பு ஏற்பட்டுள்ளது. ஆனால், புதிய வளாகத்திற்கான இடம், கட்டுமான மதிப்பீடு, பணிகள் தொடங்கும் காலக்கட்டம் உள்ளிட்ட விவரங்கள் இறுதி செய்யப்பட்ட பின்னரே முழுமையான திட்டம் குறித்து தெளிவான தகவல்கள் வெளியாகும் என எதிர்பார்க்கப்படுகிறது.

இதனால், தமிழகத்தின் நிர்வாகத் தலைமையகத்தை நவீன வசதிகளுடன் புதிய வளாகத்திற்கு மாற்றும் திட்டம் எந்த வடிவத்தில் செயல்படுத்தப்பட உள்ளது என்பதும், சென்னையில் எந்தப் பகுதியில் புதிய தலைமைச் செயலகம் அமைய உள்ளது என்பதும் அடுத்தகட்டத்தில் முக்கியத்துவம் பெறும் விவகாரமாக மாறியுள்ளது.

தலைப்பு செய்திகள்

ஃபோட்டோ கேலரி