IND vs SL: 2 விக்கெட் எடுத்த சுழற்பந்து வீச்சாளர் சரண்ஷ் ஜெயினை பாராட்டிய சாய்ராஜ் பகுதுலே

IND vs SL: 2 விக்கெட் எடுத்த சுழற்பந்து வீச்சாளர் சரண்ஷ் ஜெயினை பாராட்டிய சாய்ராஜ் பகுதுலே

கொழும்பு: இலங்கைக்கு எதிரான இரண்டாவது டெஸ்ட் போட்டியில் அறிமுகமாகி இரண்டு விக்கெட்டுகளை வீழ்த்திய இந்திய இளம் சுழற்பந்து வீச்சாளர் சரண்ஷ் ஜெயினை பாராட்டி இருக்கிறார் இந்திய அணியின் சுழற்பந்து வீச்சு பயிற்சியாளர் சாய்ராஜ் பகுதுலே. மத்திய பிரதேசத்தைச் சேர்ந்த 33 வயதான சரண்ஷ் ஜெயின், ஐபிஎல் மூலம் நேரடியாகத் தேர்வு செய்யப்படாமல், உள்நாட்டு முதல்தர டெஸ்ட் கிரிக்கெட்டில் பல ஆண்டுகளாக சிறப்பாக ஆடி இந்திய அணியில் இடம்பிடித்தார். அவர் தனது சர்வதேச அறிமுகத்திற்கு முன்பு 54 முதல்தர போட்டிகளில் விளையாடி 188 விக்கெட்டுகளை வீழ்த்தியுள்ளார்.

இலங்கை அணிக்கு எதிரான இரண்டாவது டெஸ்ட் போட்டியில் கொழும்பு மைதானத்தில் சர்வதேச அறிமுகம் பெற்ற சரண்ஷ், இலங்கை அணியின் முதல் இன்னிங்ஸில் 69 ரன்கள் கொடுத்து 2 விக்கெட்டுகளை வீழ்த்தி அசத்தினார்.

இது குறித்துப் பேசிய இந்திய சுழற்பந்து வீச்சு பயிற்சியாளர் சாய்ராஜ் பகுதுலே, "சரண்ஷ் ஜெயின் உள்நாட்டு கிரிக்கெட்டில் பல ஆண்டுகளாகக் கடுமையாக உழைத்துள்ளார். அதற்கான பலன் தற்போது அவருக்குக் கிடைத்துள்ளது. முதல் இன்னிங்ஸில் ஆரம்பத்தில் சில முடிவுகள் அவருக்குச் சாதகமாக அமையாமல் போன போதும், அதாவது இரண்டு முறை டிஆர்எஸ் அப்பீலில் விக்கெட்டுகள் திரும்பப் பெறப்பட்ட போதும், அவர் தனது மன உறுதியை இழக்காமல் தொடர்ந்து சிறப்பாகப் பந்துவீசினார்" என்று பாராட்டினார்.

நான்காவது நாள் காலையில் லஹிரு குமாராவை அவுட்டாக்கி, தனது முதல் சர்வதேச விக்கெட்டைப் பெற்ற சரண்ஷ் ஜெயின், பின்னர் சதம் அடித்து இருந்த சோனல் தினுஷாவையும் வீழ்த்தினார். அவரது பந்துவீச்சு பாணி குறித்துப் பேசிய பகுதுலே, "சரண்ஷ் ஜெயின் ஒரு தனித்துவமான பந்துவீச்சாளர். அவரது பந்துவீச்சில் சைட்-ஸ்விங் மற்றும் கிரிப்ட் நன்றாக உள்ளது. மேலும், 80 முதல் 85 கிலோமீட்டர் வேகத்தில் பந்துவீசும் திறன் கொண்டவர். இது அவரை மற்ற ஸ்பின்னர்களிடம் இருந்து வேறுபடுத்திக் காட்டுகிறது" என்று கூறினார். அறிமுகப் போட்டியிலேயே இரண்டு முக்கிய விக்கெட்டுகளை வீழ்த்தி அசத்தியுள்ள சரண்ஷ் ஜெயின் கவனம் பெற்றுள்ளார்.