பிளெமிங் இடத்தில் அல்பி மார்கல்.. பயிற்சியாளராக நியமனம்.. சிஎஸ்கே

பிளெமிங் இடத்தில் அல்பி மார்கல்.. பயிற்சியாளராக நியமனம்.. சிஎஸ்கே-வுக்கு இல்லை.. ஜேஎஸ்கே-வுக்கு!

கேப் டவுன்: தென்னாப்பிரிக்காவின் எஸ்ஏ20 லீக் கிரிக்கெட் தொடரின் 5-வது சீசனுக்கு முன்னதாக, ஜோகன்னஸ்பர்க் சூப்பர் கிங்ஸ் அணியின் புதிய தலைமை பயிற்சியாளராக முன்னாள் சிஎஸ்கே ஆல்-ரவுண்டர் அல்பி மார்கல் நியமிக்கப்பட்டுள்ளார்.

கடந்த 4 சீசன்களாக ஜோகன்னஸ்பர்க் சூப்பர் கிங்ஸ் அணியின் பயிற்சியாளராக இருந்த நியூசிலாந்தின் ஸ்டீபன் பிளெமிங் அண்மையில் தனது பதவியிலிருந்து விலகினார். சென்னை சூப்பர் கிங்ஸ் அணியின் தலைமை பயிற்சியாளர் பொறுப்பில் இருந்து விலகிய போதே அதன் சகோதர அணிகளான டெக்சாஸ் சூப்பர் கிங்ஸ் மற்றும் ஜோகன்னஸ்பர்க் சூப்பர் கிங்ஸ் ஆகிய அணிகளில் இருந்தும் விடை பெற்றார் பிளெமிங்.

பிளெமிங் தற்போது இங்கிலாந்து டெஸ்ட் கிரிக்கெட் அணியின் பயிற்சியாளராகப் பொறுப்பேற்றுள்ள நிலையில், அவருக்குப் பதிலாக அல்பி மார்கல் ஜோகன்னஸ்பர்க் சூப்பர் கிங்ஸ் அணியின் புதிய தலைமை பயிற்சியாளராகத் தேர்வு செய்யப்பட்டுள்ளார். மார்கல் ஏற்கனவே ஜோகன்னஸ்பர்க் சூப்பர் கிங்ஸ் அணியின் பயிற்சியாளர் குழுவில் ஒரு பகுதியாகச் செயல்பட்டு வந்தார் என்பது குறிப்பிடத்தக்கது.

அல்பி மார்கலுக்கும் சென்னை சூப்பர் கிங்ஸ் அணிக்கும் நீண்ட காலத் தொடர்பு உள்ளது. கடந்த 2008-ம் ஆண்டு ஐபிஎல் தொடரின் முதல் சீசன் முதல் சிஎஸ்கே அணிக்காக 6 சீசன்களில் விளையாடியுள்ள அல்பி மார்கல், ரசிகர்களின் விருப்பத்திற்குரிய வீரராக திகழ்ந்தார். அவரது அதிரடி பேட்டிங் மற்றும் துல்லியமான பந்துவீச்சு மூலம் சிஎஸ்கே அணியின் பல வெற்றிகளுக்கு முக்கியக் காரணமாக இருந்துள்ளார்.

இவரது நியமனம் குறித்து சென்னை சூப்பர் கிங்ஸ் அணியின் உரிமையாளர் ரூபா குருநாத் கூறுகையில், "அல்பி மார்கல் எங்கள் அணியின் கலாச்சாரத்தை நன்கு புரிந்துகொண்டவர். வீரர்களுடனும் ஊழியர்களுடனும் வலுவான உறவைக் கொண்டுள்ளார். அவர் இந்த புதிய பொறுப்பை ஏற்று அணியை அடுத்த கட்டத்திற்கு வழிநடத்துவதைக் காண ஆவலாக உள்ளோம்" என்று தெரிவித்துள்ளார். மேலும், சூப்பர் கிங்ஸ் அணியின் இயக்குனர் காசி விஸ்வநாதனும் மார்கலுக்குத் தனது வாழ்த்துகளைத் தெரிவித்துள்ளார்.

இது குறித்து அல்பி மார்கல் பேசுகையில், "ஜோகன்னஸ்பர்க் சூப்பர் கிங்ஸ் அணியின் தலைமை பயிற்சியாளராக நியமிக்கப்பட்டு இருப்பது எனக்குக் கிடைத்த மிகப்பெரிய பெருமை. ஒரு வீரராக சூப்பர் கிங்ஸ் ஜெர்சியை அணிந்த நான், தற்போது பயிற்சியாளராக அணியை வழிநடத்துவது மிகவும் சிறப்பான ஒன்று" என்று மகிழ்ச்சியுடன் தெரிவித்தார்.

ஸ்டீபன் பிளெமிங் விலகியதைத் தொடர்ந்து, வெவ்வேறு நாடுகளில் உள்ள சூப்பர் கிங்ஸ் அணிகளுக்குத் தனித்தனி பயிற்சியாளர்களை நியமிக்க நிர்வாகம் முடிவு செய்துள்ளது. ஐபிஎல் தொடருக்கான சிஎஸ்கே அணியின் புதிய பயிற்சியாளர் யார் என்பதை நிர்வாகம் இன்னும் அதிகாரப்பூர்வமாக அறிவிக்கவில்லை.