விராட் கோலி கிடையாது.. இந்த இந்திய வீரர் தான் நான் பந்துவீசியதிலே கடினமான பேட்டர்

விராட் கோலி கிடையாது.. இந்த இந்திய வீரர் தான் நான் பந்துவீசியதிலே கடினமான பேட்டர்- பாட் கம்மின்ஸ்

மும்பை: ஆஸ்திரேலிய டெஸ்ட் அணியின் கேப்டன் பேட் கம்மின்ஸ், தான் எதிர்கொண்டதிலேயே மிகக் கடினமான இந்திய பேட்டர் புஜாரா தான் என்று கூறியுள்ளார். விராட் கோலி அல்லது ரோஹித் சர்மா ஆகியோரை விட, புஜாராவின் விக்கெட்டை வீழ்த்துவது ஆயிரம் காகிதக் கீறல்களால் ஏற்படும் மெதுவான மரணத்தை போன்றது என்று அவர் ஒப்பிட்டுப் பேசியுள்ளார்.

சமீபத்திய நேர்காணல் ஒன்றில், தனது சர்வதேச கிரிக்கெட் வாழ்க்கையில் பல்வேறு நாடுகளைச் சேர்ந்த மிகவும் கடினமான பேட்ஸ்மேன் யார் என்று கம்மின்ஸிடம் கேட்கப்பட்டது. அதற்குப் பதிலளித்த அவர், புஜாராவின் விடாமுயற்சியும் மன உறுதியும் அவரை வீழ்த்துவதற்கு மிகவும் கடினமான ஒரு பேட்டராக மாற்றியது என்று கூறி அவரைத் தேர்ந்தெடுத்தார்.

2018-19 மற்றும் 2020-21 ஆம் ஆண்டுகளில் இந்திய அணி ஆஸ்திரேலிய மண்ணில் பார்டர்-கவாஸ்கர் கோப்பையை வென்று வரலாற்று சாதனை படைப்பதில் புஜாரா மிக முக்கியப் பங்கு வகித்தார். ஆஸ்திரேலிய பந்துவீச்சாளர்கள் எதிர்கொள்வதற்கு மிகவும் சிரமப்பட்ட பேட்டர்களில் ஒருவராக அவர் திகழ்ந்தார்.

இதுகுறித்து பேசிய கம்மின்ஸ், "இந்தியாவை பொறுத்தவரை நான் புஜாராவைத் தான் தேர்ந்தெடுப்பேன். அவரது விக்கெட்டை வீழ்த்துவது மிகவும் கடினம். அது ஆயிரம் காகித கீறல்களால் ஏற்படும் மெதுவான மரணத்தைப் போன்றது. அவர் ரன்கள் எதுவும் எடுக்காமல் 100 பந்துகளை எதிர்கொள்ள விரும்பினாலும் அதை மகிழ்ச்சியோடு செய்வார். பந்துவீச்சாளர்களுக்கு அவர் எளிதில் விக்கெட் வாய்ப்புகளை வழங்க மாட்டார்" என்று கூறினார்.

பாகிஸ்தான் அணியைப் பொறுத்தவரை, முன்னாள் சுழற்பந்து வீச்சாளரான சயீத் அஜ்மலை மிகவும் கடினமான பந்துவீச்சாளராக கம்மின்ஸ் குறிப்பிட்டுள்ளார். "அஜ்மலின் ஓவரில் கடைசி பந்தை நான் எதிர்கொண்டபோது கிளீன் போல்டானேன். அப்படி ஒரு பந்துவீச்சை நான் அதற்கு முன்பு பார்த்ததே இல்லை" என்று கம்மின்ஸ் கூறியுள்ளார்.

மேலும் இங்கிலாந்தின் அலிஸ்டர் குக், தென்னாப்பிரிக்காவின் ஏபி டி வில்லியர்ஸ், நியூசிலாந்தின் பிரெண்டன் மெக்கல்லம், இலங்கையின் திலகரத்ன டில்ஷான் மற்றும் வெஸ்ட் இண்டீஸின் கிறிஸ் கெய்ல் ஆகியோரையும் தான் எதிர்கொண்ட கடினமான வீரர்களின் பட்டியலில் கம்மின்ஸ் சேர்த்துள்ளார். குறிப்பிடத்தக்க வகையில், கம்மின்ஸின் இந்தப் பட்டியலில் உள்ள அனைத்து வீரர்களும் சர்வதேச கிரிக்கெட்டிலிருந்து ஏற்கனவே ஓய்வு பெற்றவர்கள் ஆவர்.

இந்திய அணிக்காக 103 டெஸ்ட் போட்டிகளில் விளையாடியுள்ள புஜாரா, 43.6 சராசரியுடன் 7195 ரன்கள் குவித்துள்ளார். இதில் 19 சதங்கள் மற்றும் 35 அரைசதங்கள் அடங்கும். மேலும் இந்தியாவுக்காக 5 ஒருநாள் போட்டிகளில் விளையாடி 51 ரன்கள் எடுத்துள்ள அவர், 2025 ஆம் ஆண்டில் சர்வதேச கிரிக்கெட்டிலிருந்து தனது ஓய்வை அறிவித்தார் என்பது குறிப்பிடத்தக்கது.