மேக்ஸ்வெல் வினி ராமன் தம்பதிக்கு அழகான பெண் குழந்தை பிறந்தது.. என்ன பெயர் தெரியுமா?

மேக்ஸ்வெல் வினி ராமன் தம்பதிக்கு அழகான பெண் குழந்தை பிறந்தது.. என்ன பெயர் தெரியுமா?

மும்பை: ஆஸ்திரேலிய அணியின் நட்சத்திர ஆல்-ரவுண்டர் கிளென் மேக்ஸ்வெல் மற்றும் அவரது மனைவி வினி ராமன் தம்பதியினர், தங்களுக்கு இரண்டாவது குழந்தை பிறந்துள்ள மகிழ்ச்சியான செய்தியை சமூக வலைத்தளத்தில் பகிர்ந்துள்ளனர். இந்த தம்பதியினருக்கு 'மாயா மேக்ஸ்வெல்'என்ற அழகிய பெண் குழந்தை பிறந்துள்ளது.

இவர்களுக்கு ஏற்கனவே கடந்த 2023 ஆம் ஆண்டு செப்டம்பர் மாதத்தில் பிறந்த லோகன் மேவரிக் மேக்ஸ்வெல் என்ற மகன் உள்ளார். இந்த நிலையில், மேக்ஸ்வெல் மற்றும் வினி ஜோடி தங்களது இன்ஸ்டாகிராம் பக்கத்தில் பகிர்ந்துள்ள இந்த நெகிழ்ச்சியான செய்திக்கு, முன்னாள் கிரிக்கெட் வீரர்கள், பல்வேறு கிரிக்கெட் நிறுவனங்கள் மற்றும் ரசிகர்கள் தங்களது வாழ்த்துகளைத் தெரிவித்து வருகிறார்கள்.

தங்களது செல்ல மகளின் அழகான புகைப்படத்தைப் பகிர்ந்துள்ள இந்த தம்பதியினர், "எங்கள் கனவு தேவதை வந்துவிட்டாள், மாயா மேக்ஸ்வெல்" என்று தங்களது பதிவிற்கு நேர்த்தியாகத் தலைப்பிட்டுள்ளனர்.

கிளென் மேக்ஸ்வெல் மற்றும் வினி ராமன் தம்பதியினர் முதன்முதலில் கடந்த டிசம்பர் 2013-இல் சந்தித்துக் கொண்டனர். ஆரம்பத்தில் நண்பர்களாகப் பழகிய இவர்கள், பின்னர் காதலிக்கத் தொடங்கினர். தொடர்ந்து 2017 ஆம் ஆண்டில் தங்களது காதல் உறவை அதிகாரப்பூர்வமாக வெளிப்படுத்தினர்.

இதனைத் தொடர்ந்து, பிப்ரவரி 2020-இல் இவர்களுக்கு நிச்சயதார்த்தம் நடைபெற்றது. பின்னர், மார்ச் 27, 2022 அன்று மெல்போர்னில் இருவீட்டார் முன்னிலையில் இவர்கள் திருமணம் செய்து கொண்டனர். இவர்களது திருமணம் பாரம்பரிய கிறிஸ்தவ முறைப்படியும், தமிழ் பிராமண முறைப்படியும் இரண்டு விதமான சடங்குகளுடன் நடைபெற்றது. குறிப்பாக, தமிழ் முறைப்படி நடைபெற்ற திருமண விழாவில் மேக்ஸ்வெல் பாரம்பரிய தங்க நிற ஷெர்வானி ஆடை அணிந்து கவனம் ஈர்த்தார்.

ஆஸ்திரேலிய அணியின் அதிரடி ஆட்டக்காரரான மேக்ஸ்வெல், கடந்த ஜூன் 2025-இல் சர்வதேச ஒருநாள் கிரிக்கெட் போட்டிகளில் இருந்து தனது ஓய்வை அறிவித்தார். தனது சிறப்பான ஒருநாள் கிரிக்கெட் வாழ்க்கையில் 149 போட்டிகளில் விளையாடி 3990 ரன்களையும், 77 விக்கெட்டுகளையும் அவர் வீழ்த்தியுள்ளார். 2015 மற்றும் 2023 ஆம் ஆண்டுகளில் ஆஸ்திரேலியா உலகக் கோப்பையை வென்றதில் அவர் முக்கிய பங்கு வகித்தார்.

குறிப்பாக, 2023 உலகக் கோப்பையில் மும்பையில் ஆப்கானிஸ்தானுக்கு எதிராக விளையாடி, அவர் விளாசிய ஆட்டமிழக்காத 201 ரன்கள், உலகக் கோப்பை வரலாற்றிலேயே மறக்க முடியாத மிகச்சிறந்த இன்னிங்ஸ்களில் ஒன்றாகப் போற்றப்படுகிறது.தற்போது, மேக்ஸ்வெல் புதிதாகத் தொடங்கப்படவுள்ள ஐரோப்பிய டி20 பிரீமியர் லீக் தொடருக்காகத் தயாராகி வருகிறார். இத்தொடரில் அவர் பெல்ஃபாஸ்ட் வுல்வ்ஸ் அணியின் இணை உரிமையாளராகவும் மற்றும் கேப்டனாகவும் செயல்பட உள்ளார்.